استانالىق بويجەتكەن الماگۇل قۇسايىنوۆا باسپا ءسوز قىزمەتىن جيناپ، ءوزىن باستىعى زورلاپ كەتكەندىگىن مالىمدەدى، دەپ حابارلايدى قامشى اقپاراتتىق اگەنتتىگى Kazinfo Today سايتىنا سىلتەمە جاساپ.
ءزابىر كورۋشىنىڭ ايتۋىنشا، ول بىرنەشە ستاماتولوگيالىق كلينيكالاردىڭ باسشىسى ەكەن. وقيعا 14 ماۋسىم كۇنى مەدبيكەلەر كۇنىنە ارنالعان ساۋىق كەشتەن سوڭ ورىن العان.
ساۋىق كەشتەن سوڭ ونىڭ ارىپتەسى كلينيكانىڭ باس دارىگەرىنەن الماگۇلدى ۇيىنە شىعارىپ سالۋىن وتىنگەن. قۇسايىنوۆانىڭ ايتۋىنشا، ەر ادام ونى تاكسيمەن الىپ بارىپ، كەيىننەن ساياباقتا سەرۋەندەپ قايتۋدى ۇسىنعان. كەيىننەن سول ساياباقتا ونى ەكى رەت اياۋسىز زورلىققا جىققان.
ارام پيعىلىن ىسكە اسىرىپ بولعاننان سوڭ، ول الماگۇلگە ونىڭ ەڭ ءبىرىنشى جانە ەڭ سوڭعى ەمەس ەكەندىگىن ايتقان.
«ونى مۇنداي قىلىق جاسايدى دەگەنگە ەشقاشان سەنبەس ەدىم. جۇمىستا ءوزىنىڭ ايەلىن سۇيەتىن، وتباسىلى، ساليقالى ەر ادام سەكىلدى جۇرەتىن. ونىڭ ءۇش بالاسى بار. ناماز وقيدى، ورازا ۇستايدى. ءبىراق سول ءتۇنى ونى مۇلدەم باسقاشا كەيىپتە كوردىم»، - دەيدى الماگۇل.
ءزابىر كورۋشى وقيعا ورىن العاننان سوڭ بىردەن ارىز جازۋعا جۇرەكسىنىپ، جۇمىسىنان ايىرىلىپ قالۋعا قورىققان ەكەن. ءوزى جالعىزباستى انا، ءبىر قىزى بار، ال كۇيەۋى بولسا قايتىس بولعان. سونىمەن قاتار پاتەرىنىڭ نەسيەسىن سول ءبىر ايلىعىنان تولەپ وتىر ەكەن. الايدا، وقيعا بولعان كۇننىڭ ەرتەسىنە بىردەن پوليسياعا بارىپ، شاعىمدانعان. ءزابىر كورسەتۋشى ەر ادامدى سوتتاماعان، سەبەبى ول كلينيكاعا جاقسى تابىس الىپ كەلەدى ەكەن. ءوزارا كەلىسىمگە كەلۋگە شاقىرعانىمەن، الماگۇل بۇعان قارسىلىق ءبىلدىرىپتى.
«ءقازىر ماعان قىسىم كورسەتىپ جاتىر. ماعان نە سەبەپتى جۇمىس ىستەمەيتىندىگىمدى ايتىپ، تۇسىنىكتەمە جازىپ بەرۋىمدى تالاپ ەتىپ جاتىر. الايدا مەن رەسمي جىلدىق دەمالىسقا شىققانمىن. ول ىستەيتىن جەردە مەن جۇرە المايمىن. ارىپتەستەر اراسىندا ءوزارا تالقىلاۋعا تىيىم سالىپ، جۇمىستان شىعارامىز دەپ قورقىتقان. مەنىمەن دە ەشكىم سويلەسپەيدى. سەبەبى، ول ارىپتەستەردىڭ بارلىعىنا بولعان جايتقا تەك مەنى كىنالى ەتىپ ايتىپ بەرگەن، ول مەنىمەن قارىم-قاتىناسىن جالعاستىرۋدان باس تارتقان سوڭ مەن ودان كەك الىپ ءجۇر دەپ جالا جاپقان»، - دەيدى الماگۇل.
اۋدارعان: نازەركە لابيحان
پىكىر قالدىرۋ