تەحاس شتاتىنداعى سان-انتونيو قالاسىندا ماۋسىم ايىنىڭ ورتاسىنان باستاپ مۇمكىندىگى شەكتەۋلى جاندارعا ارنالعان اتتاركسيوندار ساياباعى جۇمىس ىستەي باستادى، دەپ جازادى قامشى اقپاراتتىق اگەنتتىگى.

 ساياباقتى قۇراستىرۋشىلار مۇگەدەك جانداردىڭ حاۋىزدا ءجۇزۋ مەن دەمالۋ ورتالىقتارىندا كەزدەسەتىن قيىندىقتارىن ەسكەرىپ، ماسەلەنى شەشپەك بولادى. ساياباقتا كوڭىلدى سۋ اتتراكسيوندارىن كەزدەستىرۋگە بولادى، سونىمەن قاتار مۇگەدەك جاندارعا ساياباققا كىرۋ تەگىن.

جوبا تەك قايىرىمدىلىق تۋراسىندا عانا ەمەس، ەكسپەريمەنت رەتىندە دە ىسكە اسىرىلۋدا. بۇل جاڭا تەحنولوگيالاردى تەكسەرىستەن وتكىزۋدىڭ ۇلكەن مۇمكىندىگى.  سونداي تەحنولوگيانىڭ ءبىرى PneuChair مۇگەدەكتەر ارباسى پيتتسبۋرگ ۋنيۆەرسيتەتىندە جاسالعان، ەرەكشەلىگى – اۋا ەنەرگياسى ارقىلى قوزعالادى. ساياباققا كەلۋشىلەر وزدەرىنىڭ مۇگەدەك اربالارىن سىرتقا قالدىرىپ، ىڭعايلى ءارى ءقاۋىپسىز PneuChair اربالارىنا مىنەدى.

اربانىڭ سالماعى 40 كەلى عانا، ال قوزعالىسى 8 ساعاتقا جەتەتىندەي اربانى 10 مينۋت ۋاقىت قانا قۋاتتايدى.

سۋ اتتراكسيوندارى سۋدىڭ تەمپەراتۋراسىن قالىپتى ساقتاپ تۇرادى. سۋ سۇزگىدەن وتكەن، دەزينفەكسياسى تولىق ساقتالعان، اعزانىڭ تىتىركەنۋى سىندى ءتۇرلى اسەرلەردەن قورعالعان. كاسسادا كەزەكتە تۇرماس ءۇشىن بيلەتتى ينتەرنەت ارقىلى تاپسىرىس بەرە الادى.

«Morgan Inspiration Island» دەپ اتالاتىن ساياباقتىڭ ءار اتتراكسيونى مۇمكىندىگى شەكتەۋلى جاندارعا بەيىمدەلىپ جاسالعان. حاۋىزدار مەن ارنايى اربالاردان وزگە، بارلىق ينفراقۇرىلىم ەلەمەنتتەرى تولىق زەرتتەلگەن، تەكسەرىستەن وتكەن.

ءتىپتى، مۇگەدەك ادامدار ساياباقتان شىققان سوڭ ارنايى پروفيلاكتيكادان وتەدى.

مۇنداي ساياباقتى دۇنيەگە اكەلگەن يەسى ءوزىنىڭ 23 جاستاعى مۇگەدەك ارباسىمەن جۇرەتىن قىزىنا ارناپ سالعان ەكەن. اكەسى قىزىنىڭ ەركىن، قىسىلماي كوڭىل كوتەرگەنىن قالادى، ءومىردى سەزىنسە دەپ ويلادى.

ساياباق تەكسەرىستەن ويداعىداي ءوتىپ، بۇگىندە كەلۋشىلەرگە ەسىگى ايقارا اشىق، ءارى جاز بويى دەمالىسسىز جۇمىس جاسايدى. الداعى ۋاقىتتا اۋماعىن كەڭەيتىپ، جاڭا تەحنولوگيالاردى ىسكە قوسىپ، وزگە دە اۋدانداردا نىسانداردىڭ قۇرىلىسىن باستاۋ جوسپارلانۋدا.

شولۋشى: گۇلىم جاقان