قازاقستاننىڭ تۋريستىك پوتەنسيالى دا، پايدالانۋ مۇمكىندىگى دە جوعارى. بۇل تۋرالى دۇنيەجۇزىلىك تۋريستىك ۇيىمىنىڭ باس حاتشىسى تالەب ريفاي ق ر ۇكىمەتىنىڭ وتىرىسىندا ايتتى، دەپ جازادى قامشى اقپاراتتىق اگەنتتىگى.
«بۇگىندە تۋريزم لايىقتى تۇردە باعالانبايدى. ەكونوميكانى دامىتاتىن مۇناي ەمەس، تۋريزم. تۋريزم – قازاقستاننىڭ بولاشاعى، سىزدەردە جوعارى پوتەنسيال بار، ونى سوزبەن ايتىپ جەتكىزۋ مۇمكىن ەمەس. سوندىقتان قولدارىڭىزدا بار مۇمكىندىكتى ماكسيمالدى تۇردە پايدالانۋلارىڭىز ءتيىس. مەن بىرنەشە مەملەكەتتە بولدىم، ءبىر ايتارىم – قازاقستاننىڭ پەرسپەكتيۆاسى جوعارى»، - دەپ ايتتى ريفاي ءسوزىن پرەمەر-مينيسترگە باعىتتاپ.
سونداي-اق، اتالمىش ۇيىمنىڭ باس حاتشىسى قازاقستانداعى ءتۋريزمدى دامىتاتىن بىرنەشە جولداردى اتادى، ۇسىنىستارىن ايتتى.
«بىرىنشىدەن، وزگە مەملەكەتتەرمەن دوستىق قارىم-قاتىناستى نىعايتۋ ارقىلى ۆيزالىق رەجيمدى جەڭىلدەتكەن ءجون. ءبىز ەلەكتروندى ۆيزانى 100% قولدايمىز. ونلاين رەجيمدە ادامدار كەزەك كۇتپەيدى، ىڭعايلى ءارى ءقاۋىپسىز. ال قاۋىپسىزدىك پەن ىڭعايلىلىلىق تۋريزمگە قاجەت»، - دەدى ريفاي.
بۇدان وزگە حالىقارالىق مامان نارىققا قارجىلىق اۆياكومپانيالاردى جىبەرۋدى ۇسىندى، مۇنداي ءادىس ارقىلى تۋريستەر تومەن باعادا بيلەت الا الادى.
«تۋريستەردىڭ قازاقستانعا تەز، ارزان ءارى جەڭىل كەلۋىن قامتاماسىز ەتكەندەرىڭىز ءجون. وزدەرىڭىزگە 2-3 جىل ۋاقىتتى بەلگىلەپ، اۆياحابارلامانىڭ اشىق بولۋىن ۇيىمداستىرىڭدار»، - دەپ قوستادى.
