2017 جىلعى 28 ماۋسىمدا استانا قالاسىندا قازاقستان رەسپۋبليكاسىنىڭ مەملەكەتتىك حاتشىسى گۇلشارا ءابدىقالىقوۆانىڭ توراعالىعىمەن «مەرەيلى وتباسى» ۇلتتىق كونكۋرسىنىڭ لاۋرەاتى اتاعىن بەرۋ جونىندەگى كوميسسيا وتىرىسى ءوتتى دەپ حابارلايدى قامشى اقپاراتتىق اگەنتتىگى.

جيىندى اشقان مەملەكەتتىك حاتشى «مەرەيلى وتباسى» ۇلتتىق كونكۋرسى ەل پرەزيدەنتى ن.ءا.نازاربايەۆتىڭ باستاماسىمەن جىل سايىن وتكىزىلەتىندىگىن ايتتى. 

گ.ءابدىقالىقوۆا اتاپ وتكەندەي، بيىلعى كونكۋرستىڭ ماڭىزى  ەرەكشە، ويتكەنى مەملەكەت باسشىسىنىڭ «بولاشاققا باعدار: رۋحاني جاڭعىرتۋ» اتتى باعدارلامالىق ماقالاسىنىڭ نەگىزگى ەرەجەلەرىنىڭ ءبىرى – رۋحاني قۇندىلىقتاردى ساقتاۋ جانە جاڭعىرتۋ. ادام بويىندا رۋحاني قۇندىلىقتار قالىپتاستىرۋدا وتباسى ينستيتۋتىنىڭ اتقاراتىن ءرولى زور.

كونكۋرس قوعامداعى ىزگىلىك پەن ادامگەرشىلىكتى، نەكە جانە وتباسى ينستيتۋتتارىن نىعايتۋعا باعىتتالعان. ول بيىل ءتورتىنشى رەت وتكىزىلىپ وتىر. وسى جىلى بايقاۋعا 2879 وتباسى قاتىستى، ياعني 2016 جىلمەن سالىستىرعاندا، ولاردىڭ سانى 11،6% ءوستى (2016 جىلى 2579 وتباسى قاتىسقان). بۇل رەتتە قاتىسۋشىلاردىڭ 36،2%-ى (1041 وتباسى) – كوپبالالى وتباسىلار (2016 جىلى 1065 بولعان). 

سونىمەن قاتار، وتكەن جىلمەن سالىستىرعاندا، بەلگىلى ءبىر ماماندىقپەن اينالىساتىن اۋلەتتەر وكىلدەرىنەن قۇرالعان وتباسىلار سانى 6،8%-عا كوبەيدى (2016 جىلى – 483، 2017 جىلى – 516) جانە جاس وتباسىلار سانى دا 6%-عا ۇلعايدى (2016 جىلى – 472، 2017 جىلى – 500).