قازاقستاندىق ءانشى ديماش قۇدايبەرگەن قىتايدىڭ حۋنان پروۆينسياسىندا بولعان سۋ تاسقىنى اپاتىنان زارداپ شەككەندەرگە اقشالاي كومەك كورسەتتى،-دەپ حابارلايدى قامشى اقپاراتتىق اگەنتتىگى قازاقپاراتقا سىلتەمە جاساي وتىرىپ.

Hunan تەلەارناسىنىڭ weibo الەۋمەتتىك پاراقشاسىندا جاريالانعان اقپاراتقا قاراعاندا، ديماش Mango V قورى ارقىلى حۋنان پروۆينسياسىنداعى سۋ تاسقىنىنان كەيىن قايتا قالپىنا كەلتىرۋ جۇمىستارى ءۇشىن كومەك رەتىندە 300 مىڭ يۋان (14 ميلليون تەڭگە) قاراجات اۋدارعان. قازاقستاندىق ءانشى حۋنان پروۆينسياسىندا وتكەن «Singer» ءان بايقاۋى ارقىلى الەمگە تانىلعاندىعىن ايتا كەلىپ، بۇل كومەكتى ءوزىنىڭ ازاماتتىق بورىشى دەپ ەسەپتەيتىندىگىن جەتكىزگەن.

ايتا كەتەيىك، ماۋسىم ايىنىڭ سوڭىنان باستاپ جاۋعان تولاسسىز جاۋىن سالدارىنان قىتايدىڭ حۋنان پروۆينسياسىندا الاپات سۋ تاسقىنى بولىپ، كوپتەگەن ادامدار ۇي-كۇيسىز قالعان ەدى. اپاتتىڭ سالدارىن جويۋعا جۇڭگو ۇكىمەتى مەن ەلدىڭ تانىمال ادامدارى قول ۇشىن بەرۋدە. ەسكە سالساق، ديماش بيىلعى جىلدىڭ باسىندا حۋنان پروۆينسياسىنىڭ ورتالىق قالاسى چانشا قالاسىندا «Singer 2017» ءان بايقاۋىنا قاتىسىپ ەكىنشى ورىندى جەڭىپ الدى. قازاقستاندىق ءانشى قىتايعا جانە الەمنىڭ كوپتەگەن ەلدەرىنە تانىمال بولدى.

شولۋشى: اسەل بولات قىزى