بىردە جۇمىستان شارشاپ كەلگەن اكەسىنىڭ الدىنان ۇيىندەگى 5 جاسار بالاسى جۇگىرىپ شىعىپ:
– اكە، دالاعا شىعىپ، ويناپ كەلەيىكشى، – دەپ وتىنەدى. جۇمىستان شارشاپ كەلگەن اكەسىنىڭ بالاسىن ويناتىپ كەلۋگە ەرىنشەكتىگى ۇستاپ، ءبىر جاعىنان كوڭىلىن دە قيماي، نە دەرىن بىلمەي تۇرعاندا جۇمىس ۇستەلىندەگى دۇنيەجۇزى كارتاسىنا كوزى تۇسەدى. سىرتقا شىقپاۋدىڭ امالىن تاپقانداي بوپ اكەسى الگى كارتانى الىپ بالاسىنا:
– بالام، ەگەر مىنا كارتانى قايتا قۇراپ، تۇزەپ ءوزىنىڭ باستاپقى حالىنە كەلتىرەتىن بولساڭ، سەنى دالاعا شىعارىپ ويناتىپ كەلەمىن، – دەيدى دە كارتانى جىرتىپ-جىرتىپ، بولشەكتەپ تاستايدى. بالاسى دا «جارايدى، اكە» دەپ كارتانى قۇراستىرۋعا كىرىسىپ كەتەدى. اكەسى بالاسىنىڭ وتىنىشىنەن وڭاي قۇتىلىپ كەتكەنىنە ماساتتانىپ، كيىمىن اۋىستىرىپ، ەندى توسەگىنە جانتايا بەرگەندە 5 مينۋت وتەر-وتپەستەن بالاسى «اكە، كارتانى قۇراستىرىپ بولدىم» دەپ جۇگىرىپ كەلەدى. اكەسى ساسىپ قالادى. كەمى ەكى-ۇش ساعاتسىز قۇراستىرۋ مۇمكىن ەمەس بولعان كارتانى قالايشا 5 مينۋتتا رەتتەپ، تۇزەپ قويدى دەپ بارىپ قاراسا، قۇراق-قۇراق قىپ جىرتىپ كەتكەن كارتانىڭ پارشالارى تەگىس ءوز ورىندارىنا جايعاسىپ، باستاپقى حالىنە كەلىپ تۇر ەكەن. مۇمكىن ەمەس دۇنيەنى اپ-ساتتە قالپىنا كەلتىرىپ قويعان بالاسىنىڭ العىرلىعىنا تاڭعالعان اكەسى:
– بالام، مەنىڭ دە وڭايشىلىقپەن قولىمنان كەلمەيتىن دۇنيەنى سەن قالايشا تەز تۇزەتىپ قويدىڭ؟ – دەپتى. بالاسى دا ءوزىنىڭ تاپقىرلىعىنا ماساتتانىپ:
– اكە، قاراڭىز، دۇنيەجۇزى كارتاسىنىڭ ارتقى بەتىندە ءبىر ادامنىڭ سۋرەتى بار. سول ادامدى تۇزەتسەڭىز، كورىپ تۇرعانىڭىزداي، دۇنيەجۇزى دە ءوزىنىڭ بۇرىنعى ءتۇزۋ قالپىنا كەلەدى، – دەيدى.
ءيا، راس!
بۇگىندە ادامدار بۇل دۇنيەنى تۇزەتپەك بوپ باسىن تاۋعا دا، تاسقا دا سوعىپ ءجۇر...
شىركىن، ءار ادام ءوز-وزىن تۇزەتكەندە عوي، بۇل دۇنيە دە، وزدىگىنەن تۇزەلەر مە ەدى...
جازبا ەرلان جۇزەيەۆتىڭ Facebook پاراقشاسىنان الىندى.
