استانادا قالا كۇنى مەرەكەسىن تويلاۋ جاس جۇبايلاردىڭ نەكەسىن قيۋ راسىمىمەن تۇسپا-تۇس كەلدى، دەپ جازادى قامشى اقپارات اگەنتتىگى. قالا كۇنى قارساڭىزدا جاس جۇبايلاردىڭ نەكەلەرىن قيۋ ءراسىمى جىل سايىنعى ءداستۇر.

حالىق اراسىندا، اسىرەسە جاس جۇبايلاردىڭ اراسىندا كەڭىنەن تارالىپ كەتكەن بۇل يگى داستۇرگە بيىل 10 جىل.  

وسى جىلى نەكە قيۋ سالتاناتىنا 38 جۇپ قاتىستى، ولاردىڭ جاس مولشەرى 18-دەن 40-قا دەيىن. شارا اياسىندا جاس جۇبايلار اراسىندا سىيلىقتار مەن جۇلدەلەر ويناتىلدى. باس جۇلدە – تۇركيا مەن بۋرابايعا جولداما جانە تەلەديدار. ءراسىم اسپانعا شارلاردى جىبەرۋمەن، توي ءۆالسىن بيلەۋمەن جانە  ءتاتتى تورتتان ءدام تاتۋمەن جالعاسىن تاپتى. بۇل تۋرالى استانا قالاسى اكىمدىگىنىڭ رەسمي سايتى حابارلايدى.

مەرەيتويلىق نەكە قيۋ ءراسىمى ەكسپو-2017 كورمەسىنىڭ وتكىزىلۋىمەن تۇسپا تۇس كەلدى. وسىعان وراي «استانا ەكسپو-2017» كومپانياسى شارانىڭ وتۋىنە قولداۋ ءبىلدىرىپ، كورمە اۋماعىندا جاس جۇبايلار ءۇشىن فوتوسەسسيا ۇيىمداستىردى.

- ەگەردە بۇعان دەيىن ءار جۇپ جەكە سالتاناتتى قالاسا، بۇگىندە بۇل جەردە نەكە قيۋ سالتاناتى ءبارى ءۇشىن وتەدى. كوزدەرى باقىتقا تولى 40 قالىڭدىق توي كويلەگىن كيىپ، كۇيەۋجىگىتتەردىڭ قولىنان الىپ، بولاشاققا قادام باسقانىن ەش جەردەن كورە المايسىڭ. بۇل شىنىمەن وتە ادەمى، اسەرلى. 10 جىل بۇرىن نەكە قياتىن ءار جۇپقا ءراسىمنىڭ قالاي وتەتىنىن ءتۇسىندىرۋ قاجەت بولسا، بۇگىندە بۇل قاجەتتەلىكتىڭ كەرەگى جوق. ءبىر كۇندە، قالا كۇنى مەرەكەسى قارساڭىندا ەكى جۇپتىڭ نەكە قيۋ ءراسىمى حالىق اراسىندا دا كەڭىنەن تانىمال، - دەدى استانا قالاسى كاسىپكەرلىك جانە ونەركاسىپ باسقارماسى باسشىسىنىڭ ورىنباسارى رىسكۇل قاۋعابايەۆا.

شاراعا قالا كۇنىندە 10 جىل بۇرىن نەكەسىن قيدىرعان جۇپ قاتىستى.