قوستاناي وبلىسىندا 1406 باس قوي قويشىسىمەن بىرگە ورتەنىپ كەتتى دەپ حابارلايدى قامشى اقپاراتتىق اگەنتتىگى 24.kz-كە سىلتەمە جاساي وتىرىپ.
وقيعا جانگەلدين اۋدانىنىڭ كوكالات اۋىلىنان 30 شاقىرىم جەردە بولعان. الدىن الا بولجام بويىنشا ءورت جاي تۇسكەننەن تۇتانۋى مۇمكىن. قىرىلعان مال «ايدوس» جەكە شارۋاشىلىعىنا تيەسىلى.
وتاردى وتتان الىپ قالۋعا ۇمتىلعان شوپان دا قىزىل جالىننىڭ ورتاسىندا قالىپ قويعان.
«مارقۇم بولعان قويشىنىڭ ارتىندا سەگىز بالاسى قالدى»، – دەيدى جەرگىلىكتى تۇرعىندار.
الباربوگەت اۋىلدىق وكرۋگىنىڭ اكىمى داستان ءابدۋلليننىڭ ايتۋىنشا، ءورت سالدارىنان 1406 باس ۇساق مال شىعىن بولعان. ءقازىر اپات ورنىندا قۇزىرلى ورىن وكىلدەرى توتەنشە جاعدايدىڭ سەبەپ سالدارىن انىقتاۋمەن اينالىسىپ جاتىر.
