قازاقستان رەسپۋبليكاسىنىڭ ۇلتتىق بانكى بازالىق مولشەرلەمەنى +/-1% دالىزىمەن 10،5 پايىز دەڭگەيىندە ساقتاۋ تۋرالى شەشىم قابىلدادى، - دەپ حابارلايدى Qamshy.kz اقپاراتتىق اگەنتتىگى بانكتىڭ باسپا ءسوز قىزمەتىنە سىلتەمە جاساپ. بانك وكىلدەرىنىڭ ايتۋىنشا، جىلدىق ينفلياسيا دەڭگەيى ۇلتتىق بانكتىڭ بولجامدى باعالارىمەن سايكەس كەلەدى جانە نىسانالى ءدالىز شەڭبەرىندە قالىپ وتىر، ينفلياسيالىق كۇتۋلەر تۇراقتى دەڭگەيدە قالىپتاسقان.
«ينفلياسيالىق تاۋەكەلدەر جەكەلەگەن تاۋار نارىقتارىندا تۋىندايتىن ۇسىنىس فاكتورلارى جانە سىرتقى پارامەترلەردىڭ ەكونوميكانىڭ دامۋىنىڭ بازالىق سەنارييىنەن اۋىتقۋى تاراپىنان بولۋى مۇمكىن»، - دەلىنگەن حابارلامادا. سوعان قاراماستان، بولجامدى ينفلياسيانىڭ ورتا مەرزىمدى كەزەڭدەگى باياۋلاۋ تراەكتورياسى ناقتى پايىزدىق بازالىق مولشەرلەمەنىڭ ەكونوميكانىڭ الەۋەتتى قارقىنىنا سايكەس كەلۋىن قامتاماسىز ەتۋ ماقساتىندا قىسقا مەرزىمدى پەرسپەكتيۆادا دا، الداعى 12-18 ايدا دا بازالىق مولشەرلەمەنىڭ تومەندەۋ ىقتيمالدىعىن ارتتىراتىنى ايتىلادى.
«2017 جىلعى ماۋسىمدا جىلدىق ينفلياسيا 7،5% بولدى جانە ۇلتتىق بانكتىڭ نىسانالى ءدالىزى شەڭبەرىندە (6-8%) ساقتالىپ وتىر. ينفلياسيانىڭ اعىمداعى جىلعى 1ء-شى جارتىجىلدىقتا (3،7 %) 2016 جىلعى 1-جارتىجىلدىقپەن (4،6%) سالىستىرعاندا ەداۋىر تومەن بولۋى، سونداي-اق جىلدىڭ باسىنان بەرى ايتارلىقتاي باياۋلايتىن جانە جالپى ينفلياسيامەن سالىستىرعاندا ايتارلىقتاي تومەن دەڭگەيدە قالىپتاساتىن باعا كۇيزەلىستەرى مەن اۋىتقۋ قۇراۋىشتارى كىرمەيتىن بازالىق ينفلياسيا كورسەتكىشتەرى ينفلياسيانىڭ تومەندەۋ ءۇردىسىنىڭ ماڭىزدى بەلگىلەرى بولىپ تابىلادى. بازالىق ينفلياسيا ماۋسىمدا 6،8% (2016 جىلعى جەلتوقساندا - 8،9%) بولدى»، - دەيدى بانك وكىلدەرى.
ازىق-تۇلىك نارىعىنىڭ جەكەلەگەن سەگمەنتتەرىندەگى احۋال سوڭعى ايلاردىڭ قىسقا مەرزىمدى ينفلياسيالىق تاۋەكەلى بولدى، الايدا جاڭا ءونىم كەزەڭىنىڭ باستالۋى ازىق-تۇلىك باعالارىنىڭ جالپى سەرپىنىندەگى جاعىمسىز ۇردىستەردى رەتتەدى. سونداي-اق، حالىقتىڭ ينفلياسيالىق كۇتۋلەرى 2017 جىلدىڭ باسىنان بەرى تۇراقتىلىقتى ساقتاپ وتىر ەكەن. ماۋسىمدا ينفلياسيانىڭ ءبىر جىل العا بەرىلگەن ساندىق باعاسى 6،4% بولدى جانە ناقتى ينفلياسيا دەڭگەيىنەن تومەن، سونداي-اق ينفلياسيا ءدالىزىنىڭ 2018 جىلعا ارنالعان شەگىندە قالىپ وتىر.
«سىرتقى تاۋار نارىقتارىنداعى احۋال قۇبىلمالىلىعىمەن سيپاتتالادى. مۇناي باعاسىنىڭ ءبىر باررەل ءۇشىن 50 دوللاردان تومەن دەڭگەيدە قالىپتاسۋى جانە مامىر-ماۋسىمدا الەمدىك ازىق-تۇلىك نارىقتارىنداعى باعا يندەكسىنىڭ ءوسۋىنىڭ، نەگىزىنەن، ءسۇت ونىمدەرى مەن ءداندى-داقىلداردىڭ قىمباتتاۋى سالدارىنان جىلدامداۋى ينفلياسيالىق ايانىڭ كۇشەيۋىنە اكەپ سوعۋى مۇمكىن. سالىمشىلاردىڭ ۆاليۋتالىق باسىمدىقتارى تەڭگەمەن اكتيۆتەردىڭ پايداسىنا ساقتالۋدا. ماۋسىمنىڭ الدىن الا دەرەكتەرى بويىنشا تەڭگەمەن دەپوزيتتەر ۇلەسىنىڭ ۆاليۋتالىق دەپوزيتتەر ۇلەسىنەن اسىپ كەتۋى ودان ءارى جالعاسۋدا. تەڭگەمەن كرەديتتەر ۇلەسىنىڭ ءوسۋى دە بايقالۋدا. بۇل رەتتە كرەديتتىك رەسۋرستارعا دەگەن سۇرانىس تۇراقتى بولىپ قالۋدا جانە مولشەرلەمەلەردىڭ بىرتىندەپ تومەندەۋىمەن قاتار جۇرۋدە. كرەديتتەۋدىڭ قىسقا مەرزىمدى سەرپىنى بانك سەكتورىنداعى شوعىرلانۋ پروسەستەرىمەن شەكتەلۋدە. ەكونوميكادا ىسكەرلىك بەلسەندىلىك جاندانۋىن جالعاستىرۋدا، ىشكى ەكونوميكالىق كورسەتكىشتەر سەرپىنى قالىپقا كەلۋ ءۇردىسىنىڭ ساقتالعانىن كورسەتىپ وتىر. ماسەلەن، ماۋسىمدا ەلدەگى جيىنتىق ۇسىنىستى كورسەتەتىن قىسقا مەرزىمدى ەكونوميكالىق ينديكاتوردىڭ ءوسۋى جىلدىق كورسەتكىش بويىنشا 107،4% بولدى. الايدا حالىقتىڭ اعىمداعى جىلعى ناقتى كىرىستەرى بويىنشا باعالاۋ دەرەكتەرىن ستاتيستيكالىق ۆەدومستۆونىڭ ايتارلىقتاي تومەندەۋ جاعىنا قاراي قايتا قاراۋى تۇتىنۋ سۇرانىسىنىڭ ودان ارعى سەرپىنىنىڭ بەلگىسىزدىگىنە سەبەپشى بولۋدا. اقشا-كرەديت شارتتارى بەيتاراپ كۇيدە قالۋدا. ارتىق وتىمدىلىك جاعدايىندا اقشا نارىعىنىڭ مولشەرلەمەلەرى پايىزدىق ءدالىزدىڭ تومەنگى شەگىندە ساقتالۋدا. اعىمداعى جىلعى ءۇشىنشى توقساندا بانك سەكتورىنىڭ قارجىلىق ورنىقتىلىعىن ارتتىرۋ باعدارلاماسىنىڭ ىسكە قوسىلۋىنا بايلانىستى كەيىننەن ونىڭ كرەديتتىك بەلسەندىلىگىنىڭ قالپىنا كەلۋى كۇتىلەدى»، - دەلىنگەن قارجى رەتتەۋشىسىنىڭ حابارلاماسىندا.
