كۇمىس كومەي ءانشى قىزدارىڭىز جانار دۇعالوۆا Turkvisyon-2014 بايقاۋىنىڭ جەڭىمپازى اتاندى! ايتا كەتەلىك، Turkvizyon – ەكىنشى رەت وتكىزىلىپ وتىرعان جاڭا حالىقارالىق مۋزىكا فەستيۆالى. العاش بۇل ءان بايقاۋى تۇركيا مەملەكەتىنىڭ ەسكىشاھار قالاسىندا تۇساۋىن كەسكەن بولاتىن. ەندى مىنە، بيىلعى بايقاۋدى تاتارستان استاناسى قازان قالاسى وتكىزىپ وتىر. سايىستىڭ ەرەجەسى بويىنشا، دوداعا قاتىسۋشى ءوزى شىعارعان ءاندى تۋعان تىلىندە ورىنداۋى ءتيىس. ءان بايقاۋىندا قازاق ەلىنىڭ نامىسىن قورعاعان جانار دۇعالوۆا Turkvizyon-2014 ساحناسىنا «ءىزىن كورەم» ءانىن الىپ شىقتى. باس جۇلدەگە ۇمىتكەر انشىلەردىڭ قاتارىندا بولعان جانار ەندى ، مىنە ، جەڭىمپاز اتانىپ وتىر. ەسىڭىزدە بولسا، ءانشى قىزىمىز جارتىلاي فينالعا ءبىرىنشى نومىرمەن شىققان بولاتىن. بايقاۋدىڭ قورىتىندى كونسەرتىن اشۋ قۇرمەتىنە يە بولعان دا ەدى. تۇرك الەمىنىڭ 25 وكىلى كۇرەسكەن جارتىلاي فينالدا جەرلەسىمىز 198 ۇپاي جيناپ 3 ورىنعا تابان تىرەگەن. ال، اقىرعى اينالىمدا جانار دۇعالوۆا 225 ۇپايمەن قارسىلاستارىن شاڭ قاپتىردى. تاتار ەلىنىڭ تورىندە جۇلدىزى جانىپ، جەڭىمپاز اتاندى. قوبالجىدىق، قورىقتىق.. الايدا، ءۇمىت اقتالدى! قازاقتىڭ كوز جانارى – جانار دۇعالوۆا ، جارادى!!!

نازەركە توعجانوۆا "قامشى سىلتەيدى"