شىعىس قازاقستان وبلىسى ۇلان اۋدانىنىڭ شالقار كولىنەن قۇتقارۋشىلار 23 جاستاعى جىگىتتىڭ دەنەسىن الىپ شىقتى دەپ حابارلايدى Qamshy.kz اقپارات اگەنتتىگى yk-news.kz مالىمەتىنە سۇيەنىپ.

شقو تجد باسپا ءسوز قىزمەتى حابارلاۋىنشا، جاس جىگىت دوستارىمەن بىرگە سۋ جاعاسىندا دەمالىپ جۇرگەن. سۋعا سۇڭگىپ كەتكەن ول ءبىرشاما الىستاپ كەتىپ، جەلدىڭ قاتتىلىعىنان جاعاعا جەتە الماي قالسا كەرەك.

«جاستار دەمالىپ جۇرگەن سۋدىڭ جاعاسى جابدىقتالماعان، وندا ەسكەرتۋ بەلگىسى دە، قۇتقارۋ مۇناراسى دا جوق بولعان. بۇعان قوسا جەلدىڭ ەكپىنى دە ءقاۋىپ تۋىنداتقان. ءدال وسى كۇنى ءبىزدىڭ №6 بولىمشە قايعىلى وقيعا ورىن العان جەرگە جەتتى. ىزدەۋ جۇمىستارى شامامەن ءبىر ساعاتقا سوزىلىپ، جاعادان 50 مەتر قاشىقتىقتان، 10 مەتر تەرەڭدىكتەن جاس جىگىتتىڭ دەنەسى تابىلدى»، –  دەيدى شقو سۋدان قۇتقارۋ قىزمەتىنىڭ قۇتقارۋ بولىمشەسىنىڭ باستىعى نۇرجان بايجاقوۆ.

سۋعا ءتۇسۋ ماۋسىمى باستالعالى بەرى شىعىس قازاقستاندا 40 ادام سۋعا كەتكەن. قايعىلى وقيعالاردىڭ 30-ى جوعارىدا ايتىلعانداي جابدىقتالماعان سۋ ايدىنىندا تىركەلگەن.