«اقش اۋعانستانداعى اسكەري قۇرامادان ءوز جاۋىنگەرلەرىن الىپ شىعۋى ءتيىس»، –  دەيدى اۋعانستان بويىنشا رەسەي پرەزيدەنتىنىڭ ارنايى وكىلى زامير كابۋلوۆ. بۇل تۋرالى Qamshy.kz اقپارات اگەنتتىگى رەسەيلىك باق-تىڭ مالىمەتىنە سۇيەنىپ حابارلايدى.  

«ماسكەۋ اۋعانستاننان اقش اسكەرلەرىن شىعارۋعا اسىقپايتىن سىڭايلى. اقىرى اقش اسكەرىنىڭ قولىنان تۇك كەلمەيدى ەكەن، ولاي بولسا اۋعانستاننان دا كەتسىن. اۋعانستانداعى امەريكالىق كامپانيا قۇلدىراۋدىڭ ۇستىندە تۇر»، – دەدى رەسەيلىك ديپلومات.

ارنايى وكىلدىڭ ايتۋىنشا، اۋعانستان حالىقارالىق تەرروريزمنىڭ الەمدىك ينكۋباتورىنا اينالعان.

«اقش-تىڭ ەڭسەسى ءتۇسىپ قالدى جانە كاسىبي اسكەردى جالدامالى اسكەرمەن الماستىرۋ – اقىماقتىق. بۇل ءادىس جاقسىلىققا اپارمايدى، جالدامالىلار قۇر جۇگىرگەننەن باسقانى بىلمەيدى»، –  دەپ قوستادى كابۋلوۆ.

ايتا كەتەيىك، اقش 2001 جىلدان بەرى اۋعانستاندا ارەكەت ەتىپ كەلەدى. قازىرگى ۋاقىتتا ەلدە 8،5 مىڭعا جۋىق امەريكالىق اسكەر ءجۇر. الايدا اقش-تىڭ ارالاسۋىنان ەشقانداي وڭ وزگەرىس بايقالماعان.

بۇدان بۇرىن اقش اسكەري قىزمەتكەرلەردى جالدامالى اسكەرلەرمەن اۋىستىرۋدى جوسپارلاپ وتىرعانى بەلگىلى بولعان. Academi اسكەري كومپانياسىنىڭ باسشىسى اۋعانستاندا 5،5 مىڭ جالدامالى اسكەردى ورنالاستىرۋدى ۇسىنعان.