«بارىنە بىردەي ۇنايدى دەپ كۇتۋگە بولمايدى. بىزدە ونداي يلليۋزيا  جوق. ءبىز قوعامنىڭ بارلىق جىگى مەن توپتارىنىڭ مۇددەلەرىن ەسكەرە وتىرىپ، مەملەكەتتىڭ مۇددەسىن نەگىزگە الامىز. ەڭ باستىسى – مەملەكەت مۇددەسىن قاتاڭ ساقتاۋ. ارينە، بارىنە ۇناۋ مۇمكىن ەمەس».  ەلىمىزدىڭ ءدىن ىستەرى جانە ازاماتتىق قوعام ءمينيسترى نۇرلان ەرمەكبايەۆ Sayasat.org سايتىنا بەرگەن سۇحباتىندا ءدىن سالاسىنداعى زاڭناماعا ەنگىزىلەتىن تۇزەتۋلەردى قوعامنىڭ قالاي قابىلداۋى مۇمكىن دەگەن ساۋالعا وسىلاي جاۋاپ بەردى دەپ حابارلايدى Qamshy.kz اقپارات اگەنتتىگى ق ر ءدىن ىستەرى جانە ازاماتتىق قوعام مينيسترلىگىنە سىلتەمە جاساپ.

اعىمداعى جىلدىڭ 20 ماۋسىمى كۇنى مەملەكەت باسشىسى ءوز جارلىعىمەن قازاقستان رەسپۋبليكاسىنىڭ ءدىن سالاسىنداعى مەملەكەتتىك ساياساتىنىڭ 2017 – 2020 جىلدارعا ارنالعان تۇجىرىمداماسىن بەكىتتى. اتالعان قۇجاتتى ءدىن ىستەرى جانە ازاماتتىق قوعام مينيسترلىگى ازىرلەگەن بولاتىن.

ءمينيستردىڭ سوزىنشە، تۇجىرىمداما زاڭ جوبالاۋ ءۇشىن ساياسي-تەوريالىق نەگىزدەردى قۇرۋ ءۇشىن قاجەت. تۇجىرىمدامانىڭ نەگىزىندە زاڭناماعا وزگەرىستەر مەن تولىقتىرۋلار توپتاماسىن ازىرلەۋ بويىنشا جۇمىس جۇرگىزىلۋدە. ەگەر ونى تالقىلاۋ وڭ ناتيجە بەرەتىن بولسا، 13 زاڭ مەن 4 كودەكسكە شامامەن 60 تۇزەتۋ مەن تولىقتىرۋلار ەنگىزىلەتىن بولادى.

سونداي-اق، ۆەدومستۆا باسشىسى: «ءبىز زاڭنامانى ازىرلەۋ كەزىندە قوعامنىڭ پىكىرىنە جۇگىنەمىز جانە تۇزەتۋلەردى قوعامنىڭ بارلىق وكىلدەرىمەن اشىق تۇردە تالقىلاۋ قاعيداسىن ۇستانامىز. وسى زاڭ جوباسىن دايىنداۋ كەزىندە جوبا ساراپشىلاردىڭ، ءدىني بىرلەستىك وكىلدەرىنىڭ، ۇەۇ وكىلدەرىنىڭ كوپتەگەن تالقىلاۋىنان ءوتتى. بارلىق پىكىرلەر مەن ۇسىنىستار ەسكەرىلىپ، اۋقىمدى جانە كوپ ەڭبەكتى تالاپ ەتەتىن جۇمىس جۇرگىزىلدى. بۇل جۇمىس ءالى دە جالعاساتىن بولادى. قاراشا-جەلتوقسان ايلارىندا ونى ماجىلىسكە جولداۋدى جوسپارلاپ وتىرمىز»، – دەپ اتاپ ءوتتى مينيستر نۇرلان ەرمەكبايەۆ.