مالايزيادا جاڭا مۇسىلمان بولعانداردىڭ وقيعالارى كوبىنەسە ەتنيكالىق مۇسىلماندار ءۇشىن تانىمدى بولىپ كەلەدى، دەپ حابارلايدى Qamshy.kz اقپارات اگەنتتىگى قمدب رەسمي سايتىنا سىلتەمە جاساپ.

«العاشقىدا يسلامدى قابىلدايتىنىمدى بىلگەن مەنىڭ جۇڭگو دوستارىم ءبىراز ابىرجىپ قالدى. يسلامدى قابىلداعان سوڭ، مەن وزگەرىپ، ولارمەن ارالاسپاي قويادى دەپ ساناعان ەكەن ولار»، - دەپ شىققان تەگى جۇڭگو، ال ءوزى جاڭادان مۇسىلمان بولعان سارالين ابدۋللا اعىنان جارىلدى.

سارالين 24 جاسىندا قۇرانعا جانە ونىڭ تەرەڭ ماعىناسىنا، اسىرەسە پايعامبارلار مەن ولارعا بەرىلگەن سىناقتار تۋرالى وقي وتىرا  سۇيىسپەنشىلىگى ويانىپ، شىن جۇرەگىمەن اللانىڭ ءبىر ەكەنىن بىلدىرەتىن  ءشاھادا ايتقان.

«الدەكىم يسلامدى قابىلداعان ۋاقىتىندا، ادامدار ونىڭ ۇلتى مالايزيالىق بولادى دەپ ويلايدى. مەنىڭ دوستارىم دا مەنى مالايزيالىق بولىپ، مالايزيا مادەنيەتىن ۇستاناتىن بولادى دەپ ويلاپ، ابىرجىپ قالعان عوي».

سەلانگوردىڭ وزىندە جىلىنا 3 200 ادام يسلامدى قابىلدايدى. بۇل ادامداردىڭ وسى دىنگە كەلۋلەرىنىڭ سەبەبى ءارتۇرلى، ءبىراق ولاردىڭ ءبارى دىنگە كىرگەن سوڭ ءوز ەسىمدەرىن وزگەرتىپ جاتادى. مالايزياداعى قىتايلىق مۇسىلماندار قاۋىمداستىعى پرەزيدەنتى پروفەسسور تاۋفيك ياپ يۋن ءحيننىڭ ايتۋىنشا، ەسىمدى وزگەرتۋ كەڭ تاراعان ستەرەوتيپ.

 – «جۇڭگو ەسىمدەرىنىڭ باسىم كوپشىلىگىنىڭ وزىندىك جاقسى ماعىنالارى بار. پايعامبارىمىزدىڭ (وعان اللانىڭ سالاۋاتى مەن سالەمى بولسىن) كەزىندە مۇنداي بولماعان ەدى  – ادام ءدىندى قابىلداعاندا وعان ەسىمىن وزگەرتۋدىڭ قاجەتى بولماعان، تەك ەسىمنىڭ ماعىناسى ناشار بولعاندا عانا، ەسىم وزگەرتىلەتىن بولعان».