ارمەنيا ءتۋريزمدى دامىتۋ سالاسىندا بەلسەندى جۇمىس اتقارۋدا. بۇل تۋرالى ەكسپو-2017 حالىقارالىق مامانداندىرىلعان كورمەسىندە ارمەنيا رەسپۋبليكاسىنىڭ ۇلتتىق كۇنىن مەرەكەلەۋ بارىسىندا ەكونوميكالىق دامۋ جانە ينۆەستيسيالار مينيسترلىگىنىڭ تۋريزم جونىندەگى مەملەكەتتىك كوميتەتىنىڭ ءتوراعاسى زارمينە زەيتۋنسيان مالىمدەدى. ول ءوز سوزىندە تابىسقا جەتۋ ءۇشىن ءتۋريزمدى دامىتۋ سالاسىندا سەرىكتەستىك ورناتۋدىڭ قاجەتتىلىگىن ەرەكشە اتاپ ءوتتى. ز.زەيتۋنسياننىڭ ايتۋىنشا، ترانسشەكارالىق جانە ايماقارالىق دەڭگەيگە ءوتۋ تۋريستىك سالانى جەتىلدىرۋدە جاڭا مۇمكىندىكتەرگە جول اشادى، دەپ حابارلايدى Qamshy.kz اقپارات اگەنتتىگى ەكسپو-2017 كورمەسىنىڭ مەديا-ورتالىعىنا سىلتەمە جاساپ.

«فەستيۆالدىق، ءدىني، سپورتتىق، ساۋىقتىرۋ، قالالىق جانە ەكوتۋريزم ءتارىزدى ءتۋريزمنىڭ بەلسەندى باعىتتارىن دامىتۋ جولىندا ارمەنيانى تۋريستەر ءۇشىن تارتىمدى ەتۋ ءۇشىن بار جىگەرىمىزدى سالۋدامىز. ارمەنيادا تاۋلى (قىسقى) جانە ەكسترەمالدى تۋريزم دامىعان، سونداي-اق  شاڭعى مەن بەككانتري تۋريزمدەرىنىڭ الەۋەتى زور. وسى تۇرعىدا استانا قالاسىنداعى ەكسپو-2017 كورمەسىنە قاتىسۋ بىزگە سەرىكتەستىك قاتىناستاردى ورناتۋعا ۇلكەن مۇمكىندىك بەرەدى. جىل سايىن ارمەنياداعى تۋريستىك كورىكتى جەرلەردىڭ سانى كوبەيۋدە»، - دەدى زارمينە زەيتۋنسيان.

ءوز كەزەگىندە قازاقستان رەسپۋبليكاسى ينۆەستيسيالار جانە دامۋ ۆيسە-مينيسترى ەرلان حايروۆ ارمەنيا رەسپۋبليكاسىنىڭ كورمەگە قاتىسۋى ەكى ەل اراسىنداعى دوستىق قارىم-قاتىناستى راستايتىندىعىن اتاپ ءوتتى. سونىمەن قاتار، تۋريزم جانە ەنەرگەتيكا سالالارىنداعى ءوزارا ءتيىمدى ىنتىماقتاستىقتىڭ ماڭىزدىلىعىنا دا توقتالدى.

«ەكى ەل اراسىنداعى ءوزارا ءتيىمدى ىنتىماقتاستىقتىڭ دامۋى زاماناۋي الەم ءۇشىن ماڭىزدى بولىپ تابىلادى. وزەكتى ماسەلەلەردىڭ ورتاق شەشىمدەرىن تابۋ - ادامزات ءۇشىن ماڭىزدى. قازىرگى مۇناي داۋىرىندە «بولاشاق ەنەرگياسى» تاقىرىبى بارلىق مەملەكەتتەر ءۇشىن وزەكتى. سول سەبەپتى، حالىقارالىق قاۋىمداستىقتىڭ باستى ماقساتى -جاڭارتىلاتىن ەنەرگيانىڭ جاڭا كوزدەرىن ىزدەۋ بولىپ تابىلادى. ەكسپو-2017 كورمەسى ەنەرگەتيكا سالاسىنداعى يننوۆاسيالىق شەشىمدەردى ۇسىنۋعا جانە جاڭارتىلاتىن ەنەرگيا كوزدەرى سالاسىنداعى وزىق يدەيالاردى جۇزەگە اسىرۋ ءۇشىن بىرەگەي مۇمكىندىك بولىپ تابىلادى»، - دەدى ەرلان حايروۆ.

ايتا كەتەيىك، بيىل 27 تامىزدا قازاقستان جانە ارمەنيا رەسپۋبليكالارى اراسىندا ديپلوماتيالىق قارىم-قاتىناستاردىڭ ورناعانىنا 25 جىل تولادى.  وسى ۋاقىت ارالىعىندا ەكىجاقتى، ايماقتىق جانە حالىقارالىق ينستيتۋتتار اياسىندا قازاقستان-ارمەنيا ىنتىماقتاستىعى ايتارلىقتاي نىعايىپ، كەڭەيتىلدى.