وڭتۇستىك قازاقستان وبلىسىنىڭ اكىمدىگىندە ءوڭىر باسشىسى ج.تۇيمەبايەۆتىڭ توراعالىعىمەن كەڭەيتىلگەن ءماجىلىس ءوتتى دەپ حابارلايدى Qamshy.kz  اقپارات اگەنتتىگى وقو اكىمدىگىنىڭ باسپا ءسوز قىزمەتىنە سىلتەمە جاساي وتىرىپ. كۇن تارتىبىندە 3 ماسەلە قارالىپ، بيىلعى جىلعا قويىلعان ماقسات-مىندەتتەر ساراپقا سالىندى.

وبلىسىمىزداعى مەملەكەتتىك قىزمەت كورسەتۋ ساپاسىن ارتتىرۋ بويىنشا وبلىس اكىمى اپپاراتى باسشىسىنىڭ ورىنباسارى گۇلنۇر اسىلبەكوۆا بايانداما جاسادى. ونىڭ ايتۋىنشا، قازىرگى تاڭدا وبلىستىق جەرگىلىكتى اتقارۋشى ورگاندار تاراپىنان 194 قىزمەت ءتۇرى كورسەتىلەدى. 2016 جىلدىڭ قورىتىندىسى بويىنشا حالىققا جالپى سانى 20 181 504 مەملەكەتتىك قىزمەت كورسەتىلسە، بيىلعى جىلدىڭ 1 جارتى جىلدىعىندا بۇل كورسەتكىش 9 211 756-عا جەتكەن. 

«اعىمداعى جىلدىڭ 6 ايىنىڭ قورىتىندىسى بويىنشا 1 509 070 قىزمەت ەلەكتروندى تۇردە كورسەتىلدى. بۇل جالپى كورسەتىلگەن قىزمەتتەردىڭ 16 پايىزىن قۇرايدى. وسى تۇرعىدا 7،6 ملن. قىزمەتتى ەلەكتروندى تۇردە نەمەسە حقكو ارقىلى كورسەتۋ مۇمكىندىگى بولعانىن اتاپ ءوتۋ قاجەت. كورسەتىلگەن قىزمەتتەردىڭ 80 پايىزى دەنساۋلىق ساقتاۋ سالاسىنا تيەسىلى»، – دەيدى گۇلنۇر اسىلبەكوۆا.

سوڭعى 7 ايدىڭ قورىتىندىسى بويىنشا حقكو ارقىلى 361 532 ەلەكتروندى قولتاڭبا بەرىلگەن. الايدا ەلەكتروندى قىزمەتتەردىڭ ۇلەسى ءالى دە تومەن. سەبەبى قىزمەت ۇسىنۋشى مەملەكەتتىك ورگاندار تاراپىنان ەلەكتروندى قىزمەتتەردى الۋ جولدارى تۇرعىندارعا ءوز دەڭگەيىندە ناسيحاتتالماي وتىر.

اتالعان ماسەلەلەردىڭ ءمان-جايىنا قانىققان وبلىس اكىمى قۇجاتتاردىڭ مەرزىمدەرىن بۇزۋعا جول بەرگىزگەن اۋدان، قالا اكىمدەرى مەن وبلىستىق باسقارما باسشىلارىنا قاتاڭ تۇردە جازا قولدانىلاتىنىن ەسكەرتتى.

«مەملەكەتتىك قىزمەت كورسەتۋ ساپاسىن ارتتىرۋ – مەملەكەتتىك ساياساتتىڭ باسىم باعىتتارىنىڭ ءبىرى. سوندىقتان بۇل مىندەتكە سالعىرتتىق تانىتۋعا بولمايدى. وسى رەتتە اۋدان، قالا اكىمدەرى، وبلىستىق باسقارما باسشىلارى ەلەكتروندى قىزمەتتەردىڭ ۇلەسىن ارتتىرۋ بويىنشا حالىققا قىزمەت كورسەتۋ ورتالىقتارىمەن تىعىز جۇمىس جاساۋى قاجەت»، – دەدى جانسەيىت قانسەيىت ۇلى.

كۇن تارتىبىندەگى ەكىنشى ماسەلە – وبلىسقا ينۆەستيسيا تارتۋ بويىنشا 7 ايداعى اتقارىلعان جۇمىستاردى سارالاۋ. 2017 جىلدىڭ 7 ايىندا نەگىزگى كاپيتالعا تارتىلعان ينۆەستيسيا كولەمى 229،9 ملرد. تەڭگەنى قۇراعان. بۇل كورسەتكىش 2016 جىلدىڭ ءتيىستى كەزەڭىمەن سالىستىرعاندا 131،5 پايىزعا ءوسىپ وتىر. ال سىرتقى ينۆەستيسيالاردىڭ كولەمى 42،2 ملرد. تەڭگەنى قۇرادى.

سونداي-اق، ماجىلىستە مىندەتتى الەۋمەتتىك مەديسينالىق ساقتاندىرۋ جۇيەسىنىڭ ىسكە اسۋ بارىسى تالقىلاندى. ءاقپاراتتىق-تۇسىندىرۋ جۇمىستارىنىڭ ناتيجەسىندە وبلىسىمىزدا بارلىعى 2 ملن.130 مىڭعا جۋىق حالىققا ءتۇسىندىرۋ جۇمىستارى جۇرگىزىلىپتى. بارلىق اۋدان، قالالاردا مارتەبەسى بەلگىسىز ازاماتتاردى تۇگەندەۋ جۇمىستارى جۇرگىزىلىپ، قازىرگى كەزدە اتالعان ازاماتتاردى وزەكتەندىرۋ جۇمىستارى قورىتىندىلانىپ جاتىر.