ەلوردادا اعزا الماستىرۋ كەزەگىندە تۇرعان 297 ناۋقاستىڭ ۇشەۋى بالا، دەپ حابارلايدى Qamshy.kz اقپارات اگەنتتىگى استانا اكىمدىگىنىڭ باسپا ءسوز قىزمەتىنە سىلتەمە جاساي وتىرىپ. 

سوڭعى جىلدارى ەل مەديسيناسى ەلەۋلى جەتىستىكتەرگە قول جەتكىزدى. ونىڭ ىشىندە ترانسپلانتتاۋ سالاسى قارقىندى دامي باستادى. بۇگىندە قازاقستان تمد ەلدەرىنىڭ اراسىندا اعزا الماستىرۋ بويىنشا الدىنعى قاتاردا تۇر. 

ترانسپلانتتاۋ جونىندەگى رەسپۋبليكالىق ۇيلەستىرۋ ورتالىعىنىڭ ديرەكتورى جاقسىلىق دوسقالييەۆتىڭ ايتۋىنشا، قازاقستان بويىنشا 4 مىڭنان استام ناۋقاس اعزا الماستىرۋ كەزەگىندە تۇر.

ال استانا قالاسى بويىنشا ورگان الماستىرۋ كەزەگىندە 297 ادام بار. ونىڭ ىشىندە 3 بالاعا بۇيرەك قاجەت. ال قالعان 244 ەرەسەك ادام بۇيرەك، 37 ادام باۋىر، 7 ادام جۇرەك جانە 6 ادام وكپە اۋىستىرۋعا مۇقتاج.

«قازاقستان بويىنشا اعزا الماستىرۋ وتالارى 9 مەديسانالىق مەكەمەدە جاسالادى. ونىڭ ۇشەۋى وسى استانادا. بۇگىندە ول ورتالىقتاردا جۇرەك، وكپە، باۋىر مەن بۇيرەك اعزالارى اۋىستىرۋ وتالارى جاسالىپ كەلەدى»، – دەدى ج.دوسقالييەۆ. 

سپيكەردىڭ مالىمەتىنە جۇگىنسەك، جىل باسىنان بەرى ەلىمىز بويىنشا 185 ناۋقاسقا اعزا اۋىستىرۋ وتاسى جاسالعان. ونىڭ 30 پايىزىنا اعزا مايىتتەن الىنعان.

«اعزا ءتىرى ادامنان جانە مايىتتەن الىنادى. ءبىر ادام قايتىس بولسا دا، بەس ادامنىڭ ءومىرىن ساقتاپ قالا الادى. جۇرەك، باۋىر، وكپەسى مەن ەكى بۇيرەگى بەس ادامنىڭ ءومىرىن جالعاستىرادى دەگەن ءسوز»، – دەدى مەديا ورتالىقتىڭ تىلشىسىنە بەرگەن سۇحباتىندا ترانسپلانتتاۋ جونىندەگى رەسپۋبليكالىق ۇيلەستىرۋ ورتالىعىنىڭ ديرەكتورى جاقسىلىق دوسقالييەۆ.