استانادا «جاڭعىرۋ 3.0: رۋحاني جاڭعىرۋ» اتتى حالىقارالىق عىلىمي-پراكتيكالىق كونفەرەنسيا بولىپ ءوتتى دەپ حابارلايدى Qamshy.kz اقپارات اگەنتتىگى.

بۇل شارانى ەۋرازيالىق ينتەگراسيا ينستيتۋتى ۇيىمداستىردى.

كونفەرەنسيانىڭ ماقساتى قازاقستاندى جاڭعىرتۋدىڭ وزەكتى سۇراقتارى بويىنشا كەڭ اۋقىمدى ماسەلەلەردى تالقىلاۋ بولىپ تابىلدى.

كونفەرەنسيانىڭ جۇمىسىنا 100-دەن استام ادام قاتىسىپ، ولاردىڭ اراسىندا بەلگىلى عالىمدار ز. شاۋكەنوۆا، ز.قابىلدينوۆ، ب.ءابدىعالي ۇلى جانە قازاقستان مەن شەتەلدىڭ ساراپشى-تالداۋشى قوعامداستىعىنىڭ باسقا دا وكىلدەرى، جوعارى وقۋ ورىندارىنىڭ پروفەسسورلارى مەن وقىتۋشىلارى بولدى.

قازاقستان رەسپۋبليكاسى پرەمەر-مينيسترى كەڭسەسى باسشىسىنىڭ ورىنباسارى ەرجان جالباق ۇلى باباقۇماروۆ كونفەرەنسيا قاتىسۋشىلارىنا ءوزىنىڭ قۇتتىقتاۋ ءسوزىن ارناپ، وندا نۇرسۇلتان نازاربايەۆتىڭ قوعامدا رەزونانس تۋعىزىپ، قالىڭ كوپشىلىك اراسىندا قولداۋ تاپقان «بولاشاققا باعدار: رۋحاني جاڭعىرۋ» اتتى باعدارلامالىق ماقالاسى ءوزىنىڭ ىسكە اسىرىلۋى جونىنەن ەرەكشە ءتاسىلدى تالاپ ەتەتىن جالپىۇلتتىق اۋقىمداعى تەرەڭ ماعىنالى قۇجات بولىپ تابىلاتىنىن اتاپ ءوتتى.

– تاۋەلسىز قازاقستان تاريحىندا ءالى ەشقاشان ۇلت الدىندا سانانى جاڭعىرتۋ سەكىلدى اسا تەرەڭ ءارى اۋقىمدى مىندەت تۇرماعان ەدى. «رۋحاني جاڭعىرۋ» – مەملەكەتتىڭ بارلىق سالالارىنىڭ ساپالىق تۇرعىدان جاڭارىپ-وزگەرۋىنە نەگىز بولۋعا ءتيىس يدەيالىق تۇعىرناما. بۇگىنگى تاڭدا جاڭارۋعا دەگەن تالپىنىس ءوزىنىڭ ءمانى جونىنەن ۇلتتىق-مەملەكەتتىك ءوزىن-وزى ساقتاۋمەن جانە ساپالى دامۋمەن بىردەي بولىپ وتىر، – دەپ اتاپ ءوتتى ە. باباقۇماروۆ.

كونفەرەنسيانىڭ مودەراتورى – ەۋرازيالىق ينتەگراسيا ينستيتۋتىنىڭ ديرەكتورى عاني نىعىمەتوۆ ينستيتۋت جۇرگىزىپ جاتقان سوسيولوگيالىق زەرتتەۋلەردىڭ كەيبىر الدىن الا قورىتىندىسىن ايتىپ بەردى:

– زەرتتەۋلەر كورسەتىپ وتىرعانداي، قازىرگى تاڭدا ءۇشىنشى جاڭعىرۋ شەڭبەرىندەگى شارالاردى ىسكە اسىرۋ ءۇشىن قولايلى جاعداي قالىپتاسىپ وتىر. قوعامدىق پىكىردە رەفورماشىل كوڭىل-كۇيدىڭ جوعارى ەكەنى اتاپ وتىلۋدە. قازاقستاندىقتاردىڭ 82%-عا جۋىعى ەل ومىرىندە وزگەرىس قاجەت دەپ ەسەپتەيدى. بۇل رەتتە قازىرگى الەۋمەتتىك-ساياسي دامۋ باعىتىن قولداۋ دەڭگەيى دە مەيلىنشە جوعارى – 88%.

سوسيولوگيالىق زەرتتەۋلەردىڭ دەرەكتەرى قازاقستاندىق قوعام دامۋىنىڭ الەۋمەتتىك-مادەني اسپەكتىلەرىن قوزعايتىن جاڭعىرۋ مىندەتتەرى مەن كونستيتۋسيالىق وزگەرىستەر قازاقستاندىقتار اراسىندا قولداۋ تاۋىپ وتىرعانىن كورسەتەدى، – دەپ اتاپ ءوتتى ع. نىعىمەتوۆ.

كونفەرەنسيانىڭ جۇمىسى بارىسىندا جاۋاپتى مەملەكەتتىك قۇرىلىمدار مەن عىلىمي-ساراپشىلىق جۇرتشىلىق وكىلدەرى اراسىندا «رۋحاني جاڭعىرۋ» باعدارلاماسى مەن كونستيتۋسيالىق رەفورمانىڭ شەشۋشى باعىتتارىن ىسكە اسىرۋ بارىسىن تالقىلاۋ بويىنشا كەڭ كولەمدە سىندارلى سۇحبات ءوربىدى.

كەزدەسۋگە قاتىسۋشىلار قوعامدىق سانانى جاڭعىرتۋ باعدارلاماسى شەڭبەرىندە جۇرگىزىلىپ جاتقان جۇمىستى كەڭىنەن جازىپ-كورسەتىپ، حالىققا ءتۇسىندىرۋ ءۇشىن سۇحبات الاڭى جۇمىسىنىڭ ماڭىزى زور ەكەنىن اتاپ ءوتتى.