9 قىركۇيەكتە استانا قالاسىندا حالىقارالىق «ەكسپو-2017» كورمەسىنىڭ اياسىندا وتەتىن بوكس كەشىندە شارشى الاڭدا قازاقستاندىق سپورتشى جانقوش تۇراروۆ باعىن سىنايدى. ءدۇيىم قازاق بولىپ ءۇمىت ارتىپ وتىرعان كاسىپقوي بوكسشى قىزۋ دايىندىق ۇستىندە. الايدا ۋاقىتىنىڭ تىعىزدىعىنا قاراماستان Qamshy.kz تىلشىسىنە سۇحبات بەردى.
– 9 قىركۇيەكتە «ەكسپو-2017» كورمەسى اياسىندا قانات يسلام سىندى بوكسشىلارمەن قاتار ءسىز دە رينگكە شىعاسىز. دايىندىعىڭىز قالاي ءجۇرىپ جاتىر؟
– ءيا، اللا قالاسا، 9 قىركۇيەك كۇنى قانات باۋىرىمىز باستاعان قازاقتىڭ باتىر جىگىتتەرى الاڭعا شىعامىز. جاتتىعۋىمىز جوعارى دەڭگەيدە ءوتىپ جاتىر. امەريكادان پروموۋتەرلەرىمىز، مەنەدجەرلەرىمىز، جاتتىقتىرۋشىلارىمىز كەلىپ، بەل سىبانا دايىندالىپ جاتىرمىز. شەتەلدىك سپورتشىلار دا بار، بىلگەندەرىمەن ءبولىسىپ، كومەك كورسەتىپ جاتىر.
– «ەكسپو-2017» كورمەسى اياسىندا وتەتىن جەكپە-جەك ەلىمىز ءۇشىن اسا ماڭىزدى بولماق. مويىندارىڭىزعا ۇلكەن جۇك ارتىلدى دەسەك تە بولادى، سەبەبى ءدۇيىم قازاق بولىپ سىزدەرگە ۇلكەن ءۇمىت ارتىپ وتىر. ول كۇنگە دە 1 ايدان كەم ۋاقىت قالدى. ۇلتتىق نامىستى قورعاۋعا، قولدان بەرمەۋگە قانشالىقتى سەنىمدىسىز؟
– راسىندا، موينىمىزدا ۇلكەن جۇك تۇر. ءدۇيىم قازاق بولىپ بىزگە سەنىم ارتىپ وتىرعان كەزدە ەسە جىبەرسەڭ، قيىننىڭ قيىنى سول بولماق. ونىڭ ۇستىنە، جارىس استانادا ءوتىپ جاتقان حالىقارالىق «ەكسپو-2017» كورمەسىنىڭ اياسىندا وتپەكشى، ونى قانشاما حالىق تاماشالايدى، بار الەمنىڭ نازارىندا. بۇل تۇرعىدا ءبىر اللاعا سىيىنىپ، الداعى كەزدەسۋگە دايىندالامىز.
ەسەنى جىبەرمەيمىن! ەل بار، جۇرت بار، «ەرتەڭ جەڭىلسەڭ، ەلدىڭ بەتىنە قالاي قارايسىڭ، نە بولماق؟» دەگەن سۇراقتار مازالاپ، ءوزىمدى تەجەيمىن، قايرايمىن. سول ويلار دايىندىعىمدى ەكى ەسەگە ارتتىرىپ، بويىما كۇش دارىتادى.
– قارسىلاسىڭىزدىڭ كىم ەكەنى انىقتالدى ما؟
– انىقتالدى. قارسىلاسىم – ارگەنتينالىق برۋنو لەوناردو رومەي دەگەن جىگىت.
– قارسىلاسىڭىز جونىندە تولىعىراق مالىمەت بەرىپ وتسەڭىز.
– ول جىگىتتىڭ كورسەتكىشى دە وتە جاقسى. وسىعان دەيىن 25 كەزدەسۋ وتكىزىپ، 21ء-ىن جەڭدى، 18ء-ىن نوكاۋتپەن جەڭگەن. سوڭعى 13 كەزدەسۋىندە ۇتىلماعان. قارسىلاسىنا دەس بەرمەيتىن مىقتى جىگىت دەسەم بولادى. WBA مۇحيتارالىق بەلبەۋ ساراپقا سالىنادى. سول كۇندى ءوز باسىم اسىعا كۇتىپ ءجۇرمىن.
– كەزدەسۋگە دايىندىق ءۇشىن اقش-قا اتتانعانىڭىز بەلگىلى. نەگە اقش؟ ەلىمىزدە كاسىپقوي بوكستا جاتتىعۋعا مۇمكىندىك جاسالماعان با؟
– قازىرگى دايىندىعىمىز اقش-تا ەمەس، استانادا ءوتىپ جاتىر. امەريكادان پروموۋتەرىمىز، جاتتىقتىرۋشىلارىمىز كەلىپ، استانادا دايىندالىپ جاتىرمىز. شەتەلدەن سپارينگ-سەرىكتەستەر الدىردىق، ولار جاتتىعۋىمىزعا كومەك كورسەتىپ ءجۇر.
– ەلىمىزدىڭ مىقتى بوكسشىلارىنىڭ ءبىرى قانات يسلاممەن بىرگە دايىندالدىڭىز. قانات يسلامنىڭ بەدەلى، ابىرويى قازاق حالقىنا ءمالىم. الايدا حالىق ونى كوبىنە گەنناديي گولوۆكينمەن سالىستىرىپ جاتادى. ولاردى سالىستىرىپ جۇرگەن حالىققا ءسىزدىڭ ايتارىڭىز بار ما؟
– ەكەۋى دە مىقتى سپورتشى بولعاندىقتان، حالىقتىڭ سالىستىراتىنى بەلگىلى. «كىم مىقتى، كىم وسال؟» دەگەن ويلار مىندەتتى تۇردە تۋىندايدى. ەكەۋى دە وسال ەمەس، «ەلىم، جەرىم» دەپ جاندارىن سالىپ، جۇگىرىپ جۇرگەن جىگىتتەر. ءبولىپ جارمايمىن. قانات يسلام دا، گەنناديي گولوۆكين دە قازاقتىڭ تۋىن، ەلدىڭ نامىسىن كوتەرىپ جۇرگەن جىگىتتەر، سول سەبەپتى ەكەۋىن سالىستىرىپ، ەكى بولەك وي قالىپتاستىرا المايمىن.
– بوكسشىلاردىڭ بارىندە دەرلىك لاقاپ اتتارى بار. سول اتتارى ارقىلى الەمگە تانىلىپ جاتىر. ءسىزدىڭ لاقاپ اتىڭىز ءالى كۇنگە دەيىن جوق. ونىڭ دا ءبىر سەبەبى بار شىعار؟..
– امەريكادا سوڭعى كەزدەسۋىمدە مەكسيكالىق گۋستاۆو گاريبايانى جەڭگەن سوڭ، HBO تەلەارناسىنىڭ قىزمەتكەرى ماعان ءبارىن جويىپ كەتەتىن «تورنادو» دەپ ايتقان بولاتىن. «قازاقتىڭ بالاسى» دەگەن ات قويىپ جاتادى. الداعى ۋاقىتتا جۇرت ءبىر ەسىم قويار، ونى دا ەستي جاتارسىزدار.
– وسى ۋاقىتقا دەيىن 21 كەزدەسۋ وتكىزىپ، بارلىعىن جەڭىسپەن اياقتادىڭىز. ونىڭ سىرى نەدە؟ ءسىزدى العا جەتەلەيتىن، ءۇمىتىڭىزدى سوندىرمەيتىن قۇپيا تاسىلىڭىزبەن بولىسسەڭىز... كاسىپقوي بوكستا ۇلكەن جەتىستىككە جەتۋدە سپورتشى ءۇشىن نە ماڭىزدى؟
– ءيا، اللاعا شۇكىر دەيمىن، 21 كەزدەسۋ وتكىزىپ، ءبارىن جەڭىسپەن اياقتادىم. جەڭىستەرىمنىڭ ەشقانداي سىرى جوق. تۇبىندە ماڭداي تەرىم اققان قانشاما ەڭبەك، قيىندىق جاتىر. پسيحولوگيالىق، مورالدىق تۇرعىدا ءوز-وزىڭدى شىڭداپ، دايىنداپ، جاتتىعىپ، قيىندىقتاردىڭ ءبارىن وتكەرىپ جۇرگەن جايىمىز بار. سونىڭ ءبارىن اللانىڭ ءوزى كورىپ، بىزگە جەڭىس سىيلاپ جاتقان بولار.
مەنى بيىككە، جەڭىسكە جەتەلەيتىن – اكە-شەشەم، اجەم، جۇبايىم، باۋىرلارىم. سولارعا قاراپ ومىرگە دەگەن قۇلشىنىسىم ودان سايىن ارتا تۇسەدى. مەنى جەڭىسكە جەتەلەيتىن – وسى كىسىلەر.
سونداي-اق سەنىڭ ەڭبەكقورلىعىڭ، تالانتىڭ، قانداي ادامدارمەن كەزدەسەتىنىڭ، قانداي جۇمىستار جاسالاتىنى – ءبارى جەتىستىككە اپاراتىن داڭعىل جول.
– ۋاقىتىڭىزدىڭ تىعىزدىعىنا قاراماستان، سۇحبات بەرگەنىڭىزگە راقمەت! سىزگە ۇلكەن ءۇمىت ارتىپ وتىرعان قازاق جۇرتشىلىعىنىڭ سەنىمىن اقتايتىنىڭىزعا ءبىز سەنەمىز. ساتتىلىك جولداسىڭىز بولسىن!
– سىزدەرگە دە كوپ راقمەت! اللا رازى بولسىن!
سۇحباتتاسقان: گۇلىم جاقان
