"قىز الىپ قاشۋ" دەگەن جابايى عۇرىپتى جويۋ ءۇشىن ءار قازاق وتباسى ۇلىنا مۇنىڭ 21-عاسىردا "ادام ۇرلاۋ" دەپ اتالاتىن اۋىر قىلمىس ەكەنىن ۇقتىرۋى كەرەك. ال قىزىنا وسىعان ۇقساس قانداي دا ءبىر جاعدايعا ۇشىراسا، ەش قوبالجىماي، ورەكپىگەن توپتى الدارقاتىپ دەرەۋ ۇيىمەن حابارلاسۋىن، سوسىن باسىنا وتىز ورامال بايلاپ، قىرىق تابالدىرىقتان اتتاتسا دا، ادىراسپان جاعىپ، جولىنا كەمپىرلەر كولدەنەڭ جاتىپ السا دا، ونداي ورتاعاسىرلىق سالتتىڭ زاڭ تۇرعىسىنان جەكە باس ستاتۋسىن ەش وزگەرتپەيتىنىن ەسكەرتە بەرءۋى ءلازىم.

ءدال وسى ماسەلەگە قاتىستى "ەل نە دەيدى؟" دەگەن كومپلەكستىڭ پوستسوۆەتتىك بۋىننىڭ بويىندا بولماۋى تيىستىگىن ءتۇسىندىرۋ قاجەت. قىز بالاعا ءوز ەركىنەن تىس قانداي دا ءبىر الىپ قاشۋ وقيعاسىنىڭ ورتاسىندا قالسا، سول ۇيدەگى ەس-اقىلى دۇرىس ۇلكەن ادامدارعا سابىرمەن عانا ىنجىق ۇلدارىنىڭ سوتتالىپ كەتۋى مۇمكىن ەكەنىن ايتىپ، تۋىستارىمەن جانە زاڭ ورىندارىمەن دەرەۋ بايلانىسقا شىعۋدى تالاپ ەتىپ تۇرىپ الۋىن ۇعىندىرۋ كەرەك. جىلاماي-سىقتاماي، قاساقانا سازارعان تۇرمەن. الىپ قاشقان جىگىتتەن بولەك مۇنداي "قولدى بولعان قالىڭدىقتاردىڭ" وبالىنا قالاتىندار - "ءوزىمىز دە ءوستىپ كەلىن بوپ تۇسكەنبىز" دەپ سويلەيتىن، ءوز تراگەدياسىن ەندى جاڭا قۇرباننىڭ بويىنان كورگىسى كەلىپ جانىن جۇباتۋعا قۇشتار ادامدار.

قۇرباندار سانىن كوبەيتە تۇسەتىن جانە ءبىر ۇلكەن فاكتور - "ەسىك كورىپ قويدىم، باسىما جاۋلىق ءتۇسىپ كەتتى" دەپ ەسكىشە ويلايتىن قىز بالانىڭ قورقىنىشى. بۇل قورقىنىشتى سەيىلتۋدىڭ جولىن جوعارىدا ايتتىم. "ەل نە دەسە، و دەسىن! ودان ماحابباتىمىز ءبىر مىسقال كەمىمەيدى. جۇرەگىمىزدىڭ تورىندەگى، كوڭىلىمىزدىڭ كوگىندەگى جۇلدىزىمىزسىڭ. ءوز تاعدىرىڭا ءوزىڭ يە تاۋەلسىز تۇلعاسىڭ، زايىرلى ەلدىڭ ازاماتىسىڭ" دەپ ءوسىرۋ كەرەك قىز بالانى.

جازبا عالىم بوقاشتىڭ Facebook پاراقشاسىنان الىندى.