شەتەلدەگى قازاق ادەبيەتىنىڭ كورنەكتى وكىلى، اقىن، تانىمال جازۋشى، قوعام قايراتكەرى ءجۇمادىل مامان ۇلى 71 جاسىندا الماتى قالاسىندا  دۇنيەدەن ءوتتى. مارقۇم 1941 جىلى قحر، ىلە قازاق اۆتونوميالى وبلىسى كۇنەس اۋدانىنىڭ تۇرگەن اۋىلىندا تۋىلعان. 1956-1959 جىلدار ارالىعىندا شىڭجاڭ پەداگوگيكا ينستيتۋتىنىڭ ادەبيەت فاكۋلتەتىندە ءبىلىم العان. ءجۇمادىل مامان ۇلى العاشقى قىزمەتىن «ىلە جاستارى»، «ىلە ورەندەرى» گازەتىندە جۋرناليست بولىپ باستادى. كەيىنىرەك «ىلە گازەتى»، «ىلە جاستارى» جۋرنالى، «ىلە ورەندەرى» گازەتى مەن «ىلە ايدىنى» جۋرنالىندا ءتىلشى، جاۋاپتى رەداكتور، باس رەداكتور قىزمەتتەرىن اتقاردى. ول 1985 جىلدان 2003 جىلعا دەيىن ىلە قازاق اۆتونوميالى وبلىستىق ادەبيەت-كوركەمونەرشىلەر بىرلەستىگىنىڭ ءتوراعاسى، «ىلە ايدىنى»(جۇڭگو، قازاق تىلىندە، ۇيعىر تىلىندە جارىق كورەتىن) جۋرنالى مەكەمەسىنىڭ باستىعى ءارى باس رەداكتورى بولدى.

العاشقى ادەبي جاسامپازدىعىن 1958 جىلى جارىق كورگەن «ەمەن سىرى» اتتى باللاداسىمەن باستاعان قالامگەر سودان قازىرگە دەيىن مىڭنان استام ولەڭ، تولعاۋ، 20-دان استام داستان، باللادا، 100-گە جۋىق اڭگىمە، وچەرك، ەستەلىك، ەسسە، پوۆەست جازدى. اقىننىڭ «تاۋ جالىنى»(داستان)، «قاراقات»(ولەڭدەر جيناعى)، «اقىلباي اتايدىڭ اڭگىمەلەرى»(پوۆەست)، «اكبار-سەيت»(ولەڭمەن جازىلعان رومان)، «ءجۇمادىل داستاندارى»، «اكە باۋىرىنداعى بالا»(اڭگىمە، پوۆەستەر جيناعى)، «تۇنىق داۋىس»(ولەڭ، پوەمالار جيناعى)، «ايحان»(اۋدارما كىتاپ)، «ءان سىرى – جان سىرى»(عىلىمي ماقالا، ەسسەلەر جيناعى)، «كۇمبەزگە تۇسكەن كۇن شۋاق»(پوۆەست، حيكاياتتار جيناعى)، «اشىق ەسىك الدىندا»(ەسسەلەر جيناعى)، «اكبار باتىر» ، «ءنۇسىپحان پولكوۆنيك» (قازاق تاريحىنداعى ايگىلى ادامدار سەرياسى)، «ادامنىڭ بۇلب ۇلى – اسەت»(تاريحي ەسسە) سىندى كىتاپتارى وقىرمانمەن جۇزدەسكەن.

جۇمەكەڭنىڭ «اقىلباي اتايدىڭ اڭگىمەلەرى» سياقتى شىعارمالارى جۇڭگو، ۇيعىر، قىرعىز، جاپون تىلدەرىنە اۋدارىلعان.

ءجۇمادىل مامان ۇلى جۇڭگو حالىق جازۋشىلار قوعامىنىڭ، جۇڭگو از ۇلتتار ادەبيەتىن زەرتتەۋ قوعامىنىڭ،جۇڭگو ماناس زەرتتەۋ قوعامنىڭ، قازاقستان جازۋشىلار وداعىنىڭ مۇشەسى، ش ۇ ا ر ادەبيەت-كوركەمونەرشىلەر بىرلەستىگىنىڭ تۇراقتى جوراسى، شىنجاڭ تاڭجارىق زەرتتەۋ عىلىمي قوعامىنىڭ ورىنباسار ءتوراعاسى، ىلە قازاق ادەبيەت-كوركەمونەرشىلەر بىرلەستىگىنىڭ ءتوراعاسى، جۇڭگو "مەملەكەتتىك تاڭداۋلى مامان" اتاعىنىڭ جانە شىڭجاڭ قازاق-قىرعىز "تۇلپار" ادەبي سىيلىعىنىڭ يەگەرى. ونىڭ ەسىمى مەن ەڭبەكتەرى «حالىقارالىق ايگىلى ادامدار»، «جوڭگو جازۋشىلارى»، «جوڭگو دارىندىلارى»، «جوڭگو ماماندارى» قاتارلى كىتاپتار مەن سوزدىكتەرگە ەنگىزىلگەن.

مارقۇمىنىڭ جاتقان جەرى ءجانناتتا، توپىراعى تورقا بولسىن!