قازاقستان ونداعان پايدالى قازبا كەن ورنىن ساۋداعا شىعاردى. قازاقستان ينۆەستيسيا جانە دامۋ مينيسترلىگى رەسمي سايتىندا جەر قويناۋىن پايدالانۋ وپەراسيالارىن جۇرگىزۋ ءۇشىن بەرىلمەك 109 جەر ۋچاسكەسىنىڭ ءتىزىمى جاريالاندى. بۇل تۋرالى Qamshy.kz اقپارات اگەنتتىگى حابارلادى.

مينيسترلىك "جەر قويناۋىن پايدالانۋعا قۇقىق بەرەتىن اۋكسيون تۇرىندەگى كونكۋرس" 28 قازانعا بەلگىلەنگەنىن حابارلايدى. اۋكسيونعا قاتىسۋعا ءوتىنىش قابىلداۋ 27 قىركۇيەكتە باستالىپ، 27 قازاندا اياقتالادى.

ساۋداعا نەگىزىنەن التىن جانە ءتۇرلى-تۇستى مەتالل كەن ورىندارى شىعارىلعان. ءبىراق اۋكسيونعا قاتىسۋشىلار سونىمەن قاتار قارا مەتالدار مەن كەن ورىندارى دا بار ۋچاسكەلەر لوتىنا دا قاتىسا الادى. تىزىمدەگى سەگىز جەر ۋچاسكەسىنىڭ كەيبىرى جارتىلاي، كەيبىرى تولىقتاي قاراعاندى وبلىسىنداعى سارىشاعان اسكەري پوليگونى اۋماعىندا ورنالاسقان.

رەسەي سارىشاعان پوليگونىنىڭ ءبىر بولىگىن 1996 جىلى قازاقستان مەن رەسەي ۇكىمەتتەرى اراسىندا جاسالعان كەلىسىم بويىنشا جالعا الىپ وتىر. پوليگوننىڭ قالعان بولىگى قازاقستاننىڭ قاراۋىندا.

اۋكسيونعا نەگىزىنەن گەولوگيالىق بارلاۋ جۇمىستارىن قاجەت ەتەتىن  جەر قويناۋى ۋچاسكەلەرى شىعارىلعان.