قازىرگى ۋاقىتتا ق ر ءدىن ىستەرى جانە ازاماتتىق قوعام مينيسترلىگى «رۋحاني جاڭعىرۋ» باعدارلاماسىنىڭ «تۋعان جەر» ارنايى جوباسى اياسىندا «اتامەكەن» كىشى باعدارلاماسىن ىسكە اسىرۋعا كىرىستى. بۇل تۋرالى بۇگىن ورتالىق كوممۋنيكاسيالار قىزمەتىندە وتكەن بريفينگتە ق ر ءدىن ىستەرى جانە ازاماتتىق قوعام مينيسترىلىگىنىڭ ۆيسە-مينيسترى ابزال نۇكەنوۆ مالىمدەدى، دەپ حابارلايدى Qamshy.kz اقپارات اگەنتتىگى ق ر ءدىن ىستەرى جانە ازاماتتىق قوعام مينيسترلىگىنىڭ باسپا ءسوز قىزمەتىنە سىلتەمە جاساپ.
«اتامەكەن» كىشى باعدارلاماسى جەرگىلىكتى قوعامنىڭ ماسەلەلەرىن شەشۋدە ازاماتتاردىڭ، ۇكىمەتتىك ەمەس ۇيىمدار، قوعامدىق بىرلەستىكتەر، ۆولونتەرلەر، مەسەناتتار، بيزنەس وكىلدەرى مەن مەملەكەتتىك ورگاندار كۇشىن بىرىكتىرۋگە باعىتتالعان.
ۆيسە-مينيستر ابزال نۇكەنوۆتىڭ ايتۋىنشا «اتامەكەن» كىشى باعدارلاماسى شەڭبەرىندە 2 بازالىق باعىت ىسكە اسىرىلادى. اتاپ ايتقاندا، بۇل «الەۋمەتتىك باستامالار كارتاسى» جانە «جومارت جۇرەك» جوباسى.
«الەۋمەتتىك باستامالار كارتاسى» جوباسىنىڭ نەگىزگى يدەياسى - وڭىرلەردىڭ وزەكتى قاجەتتىلىگىن ايقىنداپ، ولاردى شەشۋ ءۇشىن ازاماتتاردىڭ بەلسەندىلىگىن ىنتالاندىرۋ ارقىلى جەرگىلىكتى تۇرعىنداردىڭ باستامالارىن ىلگەرىلەتۋ بولىپ تابىلادى.
«الەۋمەتتىك باستامالار كارتاسىنا جەرگىلىكتى قوعامداستىقتىڭ وزەكتى ماسەلەلەرىن شەشۋ بويىنشا ازاماتتار مەن ۇكىمەتتىك ەمەس ۇيىمدارمەن ۇسىنىلاتىن جوبالار ەنگىزىلەتىن بولادى»، - دەپ اتاپ ءوتتى ابزال نۇكەنوۆ.
بۇدان بولەك، كارتا مەسەناتتار، مەملەكەتتىك ورگاندار مەن بيزنەستىڭ، ۇكىمەتتىك ەمەس ۇيىمدار، ۆولونتەرلەر مەن ازاماتتاردىڭ قاتىسۋىن تالاپ ەتەتىن وڭىرلىك جوبالاردىڭ اشىق، قول جەتىمدى دەرەك قورىنا اينالاتىندىعى جانە كارتا پلاتفورماسىندا ۆولونتەرلەر جانە مەسەناتتار بازاسى قۇرىلاتىندىعى ايتىلدى.
«جومارت جۇرەك» بازالىق باعىتى الەۋمەتتىك باستامالار كارتاسىنىڭ لوگيكالىق جالعاسى بولىپ تابىلادى. بازالىق باعىتتىڭ نەگىزگى ماقساتى - بەلسەندى ازاماتتار مەن دەمەۋشىلەردى، ۇكىمەتتىك ەمەس ۇيىمداردى، ۆولونتەرلەردى جانە كاسىپكەرلەردى تۋعان جەرىن دامىتۋعا ىنتالاندىرۋ. جوبا اياسىندا 16 وڭىردە مەسەناتتاردى ىنتالاندىرۋ بويىنشا ءىس-شارالار وتكىزىلەتىن بولادى.
اتالعان شارالار كومەك كورسەتۋدى، تۋعان جەردىڭ دامۋىنا، جالپى ەلدىڭ دامۋىنا قوسقان ۇلەستىڭ ۇزدىك تاجىريبەسىن كەڭىنەن جاريالاۋعا جانە سۇيەمەلدەۋگە باعىتتالعان.
ۆيسە-مينيستردىڭ ايتۋىنشا، بۇل جۇمىستار ءارتۇرلى دەڭگەيدە جانە ءار جەردە جاسالىپ ءجۇر. «ءبىزدىڭ كوزدەگەنىمىز - سونىڭ ءبارىن جيناقتاپ، «رۋحاني جاڭعىرۋ» باعدارلاماسىنىڭ ماقساتتارىنا باعىتتاۋ»، - دەپ ءوز ءسوزىن تۇيىندەدى ابزال نۇكەنوۆ.
