سىرىم اۋدانىندا قازاق تاريحىنداعى جارقىن تۇلعالاردىڭ ءبىرى – سىرىم دات ۇلىنىڭ تۋعانىنا 275 جىل تولۋىنا وراي مادەني ءىس-شارالار ۇيىمداستىرىلدى، دەپ جازادى Qamshy.kz اقپارات اگەنتتىگى.

شاراعا وبلىس اكىمى ا. كولگىنوۆ، سىرىم باتىر مەن ونىڭ ەرلىگى تۋرالى جازىلعان "تار كەزەڭ" تاريحي رومانىنىڭ اۆتورى، جازۋشى ق. مۇحامبەتقالييەۆ، مەملەكەتتىك سىيلىقتىڭ يەگەرى انەس ساراي جانە ءبىر توپ عالىمدار مەن قوناقتار قاتىستى. الدىمەن قوناقتار "سىرىم شىققان توبە" ەسكەرتكىشىنە گۇل شوقتارىن قويدى. سونداي-اق جۋىردا عانا "رۋحاني جاڭعىرۋ" باعدارلاماسى اياسىندا جوندەۋدەن ءوتىپ، قۇندى جادىگەرلەرمەن تولىققان الاش مۋزەيىن، جاڭادان اشىلعان سىرىم مۋزەيىن، الاش ساياباعىن ارالادى. كەيىن باعدارلاما اشىق اسپان استىندا ۇيىمداستىرىلعان مەرەكەلىك شارالارمەن جالعاستى. 

اسقان باتىرلىق، ەرلىك ىستەرمەن وشپەس ءىز قالدىرعان زاڭعار تۇلعانىڭ ۇلت تاريحىنداعى ەرەكشە ورنىنا توقتالىپ، جۇرتشىلىقتى مەرەيلى تويمەن قۇتتىقتاعان وبلىس اكىمى: - ەلباسى ن.نازاربايەۆ "بولاشاققا باعدار: رۋحاني جاڭعىرۋ" باعدارلامالىق ماقالاسىندا ۇلتتىق سانانى سەرپىلتۋ جايىن ەرەكشە اتاپ ءوتتى. تاريحتى تانىپ، زەردەلەۋ ارقىلى عانا كەلەشەگىمىزدى باعدارلاۋعا بولاتىندىعىن ايتتى.

سوندىقتان ەل ءۇشىن، جەر ءۇشىن تەر توككەن تاريحي تۇلعالارىمىزدىڭ ەرلىگىن دارىپتەۋ -  ءبارىمىزدىڭ ۇلت الدىنداعى بورىشىمىز. ال اتقارىلىپ جاتقان ءىس ەڭ الدىمەن تاۋەلسىزدىگىمىزدىڭ ارقاسى، - دەدى. 
سونداي-اق كەشەلى بەرى سىرىم باتىردىڭ 275 جىلدىق مەرەيتويىنا وراي ءوتىپ جاتقان  شارالاردىڭ بارلىعى "رۋحاني جاڭعىرۋ" باعدارلاماسىمەن ۇندەسىپ جاتقانىن ايتتى. 

سىرىم اۋدانىنداعى ايتۋلى شارا وبلىستىڭ ونەر ۇجىمدارىنىڭ تەاترلاندىرىلعان قويىلىمدارى مەن كونسەرتتىك باعدارلاماعا ۇلاستى. سونداي-اق ات بايگەسى ۇيىمداستىرىلىپ، قازاق كۇرەسىنەن جەڭىمپازدار انىقتالدى. 

ايتا كەتۋ كەرەك، بۇل تويعا وبلىسىمىزدىڭ 12 اۋدانىنىڭ بارلىعى اتسالىسىپ، اقشاڭقاي كيىز ۇيلەر تىگىلگەن. ولاردىڭ ءارقايسىسىندا اۋدان مۋزەيىندەگى قۇندى جادىگەرلەر كوپشىلىك نازارىنا ۇسىنىلدى.