رەسەي كونتينەنتارالىق سىناق ءۇشىن «توپول» اتتى بالليستيكالىق زىمىرانىن استراحان وبلىسىنداعى پوليگونىنان ۇشىردى دەپ حابارلايدى Qamshy.kz اقپارات اگەنتىگى ازاتتىق سايتىنا سىلتەمە جاساپ. رەسەيدىڭ قورعانىس مينيسترلىگى ايتقانداي، سىناق زىمىرانى «قازاقستاندا بەرىلگەن نىساناعا ءدوپ ءتيدى».

سۋرەت ازامات احمەدوۆتىڭ Facebook پاراقشاسىنان الىندى.

الەۋمەتتىك جەلى قولدانۋشىلارى اسپاندا جارقىلداعان دەنەلەردى بەينەتاسپاعا جازىپ العان، ول زىمىراننىڭ نىساناعا تيگەندەگى قالعان ءىزى بولسا كەرەك. جاريالانعان بەينەتاسپالاردىڭ استىنا كوپتەگەن جەلى قولدانۋشىلارى پىكىر ءبىلدىرىپ جاتىر. بۇل تۋرالى 27-نە قاراعان ءتۇنى اتىراۋ، قوستاناي جانە قاراعاندى وبلىستارىنىڭ تۇرعىندارى جازىپ وتىر.

اسپانداعى ەرەكشە جارقىلدار جونىندە تەك قازاق جەلى قولدانۋشىلارى عانا ەمەس، رەسەيلىك ءبىرقاتار تۇرعىندارى دا تالقىلاپ جاتىر. ولاردىڭ كەيبىرى بۇل جات پلانەتادان كەلگەن ۇشاتىن نىسانا دەسە كەيبىرى بۇل قۇبىلىستى مەتەوريتپەن شاتاستىرۋدا.