پاۆلوداردا قالالىق مەكتەپتەردىڭ وقۋشىلارى ءبىر اپتا بويى كەمەدە ساباق وقۋدا، دەپ حابارلايدى  Qamshy.kz اقپارات اگەنتتىگى pavlodarnews.kz مالىمەتىنە سۇيەنىپ.

اتالمىش وقۋ اپتالىعىن پاۆلودار گەوگرافيا ءۇيى ماڭىندا قۇرىلعان «فارۆاتەر» ەرتىس ولكەتانۋ اكادەمياسى وتكىزۋدە.

ءبىز ەكى جىل بويى وسى جوبانى ىسكە اسىرۋ ءۇشىن دايىندالدىق، - دەيدى پاۆلودار گەوگرافيا ءۇيىنىڭ ديرەكتورى الەكساندر ۆەرۆەكين.

"ماقساتىمىز جۇزەگە اسىپ، ەۋروپالىق قايتا قۇرۋ بانكى مەن قازاقستان رەسپۋبليكاسىنىڭ ءبىلىم جانە عىلىم مينيسترلىگى قولداۋ كورسەتتى. قالالىق ورتا مەكتەپتەردەن 16 بالا جيناپ الدىق، ولاردىڭ قاتارىندا ىشكى ىستەر باسقارماسىندا ەسەپتە تۇرعاندار دا بار. ءبىر اپتا بويى ولارعا زوولوگتار، بيولوگتار، تاريحشى، ولكەتانۋشىلار ەرتىس وزەنى بويىندا لەكسيالار مەن تاجىريبەلىك ساباقتار وتكىزەدى. سولايشا، وقۋشىلار كەمەگە ءمىنىپ، تۋعان قالامىزدىڭ تاريحىمەن تەرەڭىرەك تانىسا الادى. مەنىڭشە، وقۋشىلار اراسىندا مۇنداي جوبا ەلىمىزدە تۇڭعىش رەت جۇزەگە اسۋدا. انىق بىلەرىم، رەسەيدە ستۋدەنتتەرگە وسىلاي ساباق وتكىزەدى، ال، ءبىز مەكتەپ قابىرعاسىنداعى جاستاردى قامتىعاندى ءجون كوردىك"، دەپ مالىمدەدى ا. ۆەرۆەكين. 

ايتا كەتەيىك، بۇگىن ەرتىس وزەنىنىڭ ارعى جاعىنا وتكەن سوڭ وقۋشىلار جەكەلەي تاپسىرمالار ورىنداپ، مۇعالىمدەردىڭ نۇسقاۋلىعىمەن سيرەك كەزدەسەتىن وسىمدىكتەردى ىزدەدى.