ق ر قورعانىس مينيسترلىگى رەسەيدەگى بالليستيكالىق زىمىراننىڭ ۇشىرىلعانى جايلى قازاقستاندىقتارعا الدىن الا ايتىپ وتىرۋ مۇمكىن ەمەس ەكەنىن حابارلادى، دەپ جازادى Qamshy.kz اقپارات اگەنتتىگى.

"بالليستيكالىق زىمىرانداردى ۇشىرۋ - رەسەي فەدەراسياسى قارۋلى كۇشتەرىنىڭ جەكە شارۋاسى. شەتەلدەگى قارۋلاندىرۋ، قورعانىس ونەركاسىبى كەشەندەرى جانە ولاردىڭ قارۋلى كۇشتەرىنىڭ قىزمەتى قازاقستاننىڭ قۇزىرەتىنە كىرمەيدى. بۇل قانداي دا ءبىر شابۋىل ارەكەتى نەمەسە مەملەكەتتىك شەكارا ەرەجەلەرىن بۇزۋ ارەكەتى ەمەس"، - دەدى مينيسترلىكتىڭ باسپا ءسوز قىزمەتىندە.

سونداي-اق، بالليستيكالىق زىمىراننىڭ ۇشىرىلۋى كورشى ەلدەردىڭ اۋماعىنا ەش زيان تيگىزبەيتىنى ايتىلادى.

"بۇگىندە ءبىز "بايقوڭىر" عارىش ايلاعىنان جوسپارلى تۇردە ۇشىرىلاتىن زىمىراندار تۋرالى حابارلاپ وتىرامىز. ءبىراق بالليستيكالىق زىمىران ۇشىرۋ عارىش قىزمەتىنە جاتپايدى"، - دەدى ۆەدومستۆوداعىلار.

ەسكە سالا كەتەيىك، وسىعان دەيىن 26 قىركۇيەكتە كەشكى ۋاقىتتا اقتاۋ، اتىراۋ، قوستاناي جانە قازاقستاننىڭ تاعى باسقا وڭىرلەرىنىڭ تۇرعىندارىنىڭ اسپاندا جانىپ تۇرعان وبەكتىنى بايقاعانى حابارلانعان بولاتىن.