ق ر اۋىل شارۋاشىلىعى ۆيسە-مينيسترى گۇلميرا يسايەۆا كەيبىر ساراپشىلاردىڭ قىستا كارتوپ باعاسى 300 تەڭگەگە جەتەدى دەگەن بولجامىنا قاتىستى پىكىر ءبىلدىردى، دەپ حابارلايدى Qamshy.kz اقپارات اگەنتتىگى اشم باسپا ءسوز قىزمەتىنە سىلتەمە جاساپ.

«ازىق-تۇلىكتىڭ نەگىزگى 25 ءتۇرى بويىنشا ءبىز ءوزىمىزدى شامامەن 80 پايىزعا قامتاماسىز ەتىپ وتىرمىز. كارتوپپەن دە ءوزىمىزدى تولىقتاي قامتاماسىز ەتە الامىز. ارينە، ءونىم بولماعان جىلداردا ءوندىرىس كولەمى تومەندەيتىندىگى بەلگىلى. ءبىراق بۇل رەتتە نارىق ءوزىن-وزى تولىقتىرىپ وتىرادى. قازاقستان اۋماعىنا سىرتتان كارتوپ الىپ كەلگەن كەزدەر دە بولعان. بۇل باعانى ءبىرشاما تۇراقتاندىرۋعا سەپتىگىن تيگىزەدى. مەنىڭشە، مۇنداي جايت باعا وسىمىنە اكەپ سوقتىرماۋى ءتيىس.  ياعني، كارتوپ قولجەتىمدى ءارى اقىلعا سىيىمدى باعادا ساتىلادى. سايكەسىنشە 300 تەڭگە، مۇنداي باعا قىستا دا بولمايدى»، - دەدى گۇلميرا يسايەۆا بۇگىن ۇكىمەت ۇيىندە وتكەن باسپا ءسوز ءماسليحاتىنان كەيىن ب ا ق وكىلدەرىنىڭ ساۋالىنا وراي.

بۇعان دەيىن ءىرىلى-ۇساقتى ساۋداگەرلەردىڭ تاۋار باعاسىنا قوياتىن ۇستەمە باعاسىن ەسكەرسەك، بيىل قىستا قازاقستانداعى 1 كەلى كارتوپتىڭ باعاسى 250-300 تەڭگەگە دەيىن جەتۋى مۇمكىن ەكەندىگى حابارلاعان بولاتىن.

بيىل شارۋالار كارتوپ باعاسى كۇرت قىمباتتايدى دەپ وتىر. بۇعان سەبەپتەر كوپ، ماسەلەن، ەلىمىزدەگى جانە كورشى ەلدەردەگى اۋا رايى بيىل ەگىنگە قولايسىز كەلدى، ءونىمدى جەتىلدىرۋگە كەتەتىن شىعىندار كوبەيگەن. 1 گەكتار القاپتا كارتوپ ءوسىرۋ ءۇشىن ورتاشا 1 ملن تەڭگە جۇمسالدى، ال ورتاشا ونىمدىلىك گەكتارىنا 230 سەنتنەردى قۇرادى. ءدال ءقازىر 1 كەلى كارتوپتىڭ كوتەرمە باعاسى 55 تەڭگە، ال ادەتتە كۇز مەزگىلىندە 35 تەڭگەدەن اسپايتىن.