دانا حالقىمىز «اۋزى قۇلىپ ساندىقتى ءتىس اشپاسا، ءتىل اشادى» دەگەن. وسىدان-اق، ءتىل ولشەۋسىز قازىنا، ءورىسى كەڭ الەم ەكەندىگىن ۇعىنعانداي بولامىز. ەلباسى ن.ءا. نازاربايەۆ ءوزىنىڭ «بولاشاققا باعدار: رۋحاني جاڭعىرۋ» ماقالاسىندا «ەگەر جاڭعىرۋ ەلدىڭ ۇلتتىق-رۋحاني تامىرىنان ءنار الماسا، ول اداسۋعا باستايدى» دەگەن بولاتىن. دەمەك، ۇلتتىڭ رۋحاني تامىرىنىڭ باستاۋى دا تىلدەن ەكەنى ءسوزسىز. ەلىمىزدە مەملەكەتتىك ءتىلدىڭ قولدانىس اياسىن كەڭەيتۋ، ونى بارلىق وتانداستارىمىزدىڭ ءبىلۋى، ءسوز جوق قازاقستاندىق ءپاتريوتيزمدى قالىپتاستىرادى.
«ءتىل شەبەرى-2017» ءداستۇرلى بايقاۋى جاھاندىق وركەنيەت پەن ەلىمىزدىڭ دامۋ باعىتىنا ساي ءۇش ءتىلدى – قازاق، ورىس جانە اعىلشىن تىلدەرىن جەتىك مەڭگەرگەن، جان-جاقتى ءبىلىمدى، ءوز سالاسىنىڭ كاسىبي مامانى دەپ تانىلعان مەملەكەتتىك قىزمەتشى جاستاردى انىقتاپ، قولداۋ كورسەتۋ ماقساتىندا جۇزەگە اسىپ كەلەدى. شەبەر سويلەۋ-ۇلكەن ونەر. اسىرەسە مەملەكەتتىك قىزمەتشى جاستاردىڭ ءتىل شەبەرلىگىنىڭ كوركەمدىگى وتە قاجەت-اق. سەبەبى، ءتىلدى تىگىسىن جاتقىزىپ، دۇرىس قولدانعان ءسوز ونەرى ارقىلى كوزدەگەن ماقساتىڭا ءبىر تابان جاقىنداي تۇسەسىز. ول ءۇشىن تىلىڭىزدەن بال تامىپ تۇرۋى كەرەك.
اتالمىش بايقاۋعا تالابىن ۇشتاپ، ءۇمىتىن ۇكىلەپ كەلگەن جاستارعا اقجارما تىلەگىن اقتارىپ، ءتىل بايگەسىندە مىڭنان تۇلپار، جۇزدەن جۇيرىك شىعۋىنا اق جول ايتقان ش. شاياحمەتوۆ اتىنداعى تىلدەردى دامىتۋدىڭ رەسپۋبليكالىق ۇيلەستىرۋ-ادىستەمەلىك ورتالىعىنىڭ ديرەكتورى ەربول ەردەمبەك ۇلى تىلەشوۆ سايىستىڭ شىمىلدىعىن اشتى. ايتۋلى ءبىلىم مەن بىلىكتىلىك بايگەسىنە مەملەكەتتىك ورتالىق اتقارۋشى ورگانداردا قىزمەت ەتەتىن 21-29 جاس ارالىعىنداعى 18 ۇمىتكەر قاتىستى.
بايقاۋ شارتىنا ساي قاتىسۋشىلار «تۇساۋكەسەر»، «ۇلتتانىم»، «ونەرتانىم» بولىمدەرى بويىنشا ب ا ق سىنادى. باستى ۇستانىم- ولاردىڭ ءۇش ءتىلدى مەڭگەرۋ دەڭگەيى مەن تىلدىك نورمانى ساقتاۋى، ورفورگافيالىق جانە ورفوەفيالىق ساۋاتتىلىقتارىنا كوڭىل اۋدارىلدى. سونىڭ ىشىندە مەملەكەتتىك ءتىلدى جەتىك ءبىلۋى قازىلار القاسىنىڭ نازارىندا بولدى.
سايىستا ۇشقىرلىعىمەن، بىلىمدىلىگى، تاپقىرلىعى ارقىلى كوزگە ءتۇسىپ، قارسىلاستارىنان وق بويى وزىق شىققان ق ر جوعارعى سوتىنىڭ مامانى ارىستانبەكوۆ نۇرداۋلەتتى قازىلار القاسى جەڭىمپاز دەپ تانىپ باس جۇلدە 350 مىڭ تەڭگەنى قانجىعاسىنا بايلادى. ال، ءبىرىنشى ورىن 200 مىڭ تەڭگە ق ر مەملەكەتتىك كۇزەت قىزمەتىنىڭ وفيسەرى ءابدىرامانوۆا گۇلجاينانىڭ ۇلەسىنە ءتيىپ، ەكىنشى ورىن 150 مىڭ تەڭگە قۇ ۇلتتىق بانكىنىڭ باس مامانى وسكەنبايەۆا ايگەرىم ەنشىلەپ، ءۇشىنشى ورىن 100 مىڭ تەڭگەنى ق ر دەنساۋلىق ساقتاۋ مينيسترلىگىنىڭ ساراپشىسى مۇحامەتبەك باقجان يەمدەندى. سونىمەن قاتار، كورەرمەننىڭ كوزايىمىنا اينالعان ق ر ادىلەت مينيسترلىگىنىڭ ساراپشىسى قۋانىشبەك شىنار مەن رەسپۋبليكالىق بيۋدجەتتىڭ اتقارىلۋىن باقىلاۋ جونىندەگى ەسەپ كوميتەتى، پەرسونالدى باسقارۋ جانە اقپاراتتىق قاۋىپسىزدىك ءبولىمىنىڭ ساراپشىسى ابىلتايەۆ عابيت 50 مىڭ تەڭگە ىنتالاندىرۋ سىيلىعىن الدى.
باس جۇلدەنىڭ يەگەرى ارىستانبەكوۆ نۇرداۋلەت قۋانىش قۇشاعىندا تۇرىپ، ويىمەن ءبولىسىپ: «بۇگىن ارىپتەستەرىمنىڭ اراسىندا ۇزدىك دەپ تانىلىپ، جەڭىمپاز اتانعانىما بەك قۋانىشتىمىن. مۇنداي سايىستار ءبىزدىڭ جىگەرىمىزدى جانىپ، تابىستارعا جەتۋگە قۇلشىندىراتىنى ءسوزسىز. اسىرەسە، «ءتىل شەبەرى» بايقاۋىنىڭ جەڭىمپازى بولۋ وڭاي ەمەس ەكەن. جان-جاقتى ءۇش ءتىلدى ەركىن مەڭگەرۋ بۇگىنگى كۇننىڭ باستى تالابى ەكەنىن ۇعىنىپ كەلەمىز. جانعا شۋاق، كوڭىلشە قۋات بەرىپ، تاۋەلسىز ەلىڭنىڭ بولاشاعى جولىندا ەڭبەكتەنۋگە جەتەلەيتىن وسىنداي سايىستاردىڭ جالعاسىن تاۋىپ جاتسا نۇر ۇستىنە نۇر ەمەس پە. بايقاۋدى ۇيىمداستىرۋشىلارعا دەگەن العىسىم شەكسىز» دەپ ءسوزىن تۇيىندەسە، سايىس ۇمىتكەرى ق ر ينۆەستيسيالار جانە دامۋ مينيسترلىگىنىڭ باس ساراپشىسى سەيىلحان ادىلبەك ءوز پىكىرىن العا تارتتى: «مەن وسىمەن ەكىنشى جىل قاتارىنان قاتىسىپ وتىرمىن. بىلايشا ايتقاندا بايقاۋدىڭ «اقساقالىمىن». مەن جۇلدەگە ىلىكپەي قالعانىما ەش وكىنبەيمىن. «جۇرە-جۇرە كوپتى كورەسىڭ» دەگەندەي، قايتا كوپ نارسەنى ۇيرەندىم. شىڭدالۋ مەكتەبىنەن ءوتىپ جاتىرمىن دەسە دە بولادى. مەنىڭ ۇسىنىسىم «ونەرتانىم» دەپ اتالاتىن ءۇشىنشى بولىمدەگى ءۇش تىلدە جاڭىلتپاش وقۋدىڭ ورنىنا باسقاشا ءبىر قىزىقتىراق، ءبىلىمىڭدى انىقتاۋعا باعىتتالعان سايىس بولسا ەكەن دەيمىن. سودان كەيىن ۇمىتكەرلەردىڭ ويلانۋىنا ءارى جاۋاپ بەرۋىنە بەرىلەتىن التى مينۋت ۋاقىت وتە كوپ سەكىلدى. بولاشاقتا وسى ۇسىنىستاردى ۇيىمداستىرۋشىلار قاپەرىنە الادى دەگەن ويدامىن. جالپى، بايقاۋدىڭ ماقساتى، باعىتى وتە دۇرىس»
ءسويتىپ، قىزىقتى، تارتىستى وتكەن سايىس مارەسىنە جەتتى. بايقاۋعا قاتىسقان بارلىق ۇمىتكەرلەر العىس حاتتارمەن ماراپاتتالىپ، گۇل شوقتارى ۇسىنىلدى. كلارا تولەنبايەۆا، رۇستەم نۇرجىگىت، مۇرات قوجا، ايگۇل قوسانوۆا، «گۇلدەر-اي» بي ءانسامبىلى سياقتى ونەرپازداردىڭ قاتىسۋمەن كونسەرت قويىلىپ، قاتىسۋشىلار مەن كورەرمەندەردى ءبىر سەرپىلتىپ تاستادى.
