قازاقستان رەسپۋبليكاسى ۇكىمەتىنىڭ 2017 جىلى 13 مامىردا قابىلدانعان قاۋلىسىنا سايكەس اقمولا وبلىستىق فيلارمونياسىنا ۇكىلى ىبىرايدىڭ ەسىمى بەرىلدى، دەپ حابارلايدى Qamshy.kz اقپارات اگەنتتىگى اقمولا وبلىسى ىشكى ساياسات باسقارماسىنىڭ وڭىرلىك كوممۋنيكاسيالار قىزمەتىنە سىلتەمە جاساپ.

كلاسسيكالىق حالىق مۋزىكاسىنىڭ بەلگىلى وكىلدەرىنىڭ ءبىرى، سۋىرىپ سالما اقىن، بەلگىلى ءانشى – ۇكىلى ىبىراي ساندىباي ۇلى كەدەي شارۋا وتباسىندا تۋعان. ول قازاقتىڭ اتاقتى ءانشى-اقىندارى ارىستان، ورىنباي، شال اقىن، سەگىز سەرى، تەزەكباي، شوجە، نۇركەي، ءبىرجان سال، اقان سەرىلەردىڭ اندەرىن، ايتىستارىن ەل اراسىندا تاراتىپ، مىناۋ ءبىرجاننىڭ، مىناۋ اقاننىڭ دومبىرانى قولدارىنا العانداعى ءوز ىرعاعى، ءوز قۇلاق كۇيى دەپ، ءارقايسىسىن ءوز اۋەزىمەن، ءوز اۋەنىمەن، سارىنىمەن ورىنداپ بەرە العان.

ۇكىلى ىبىرايدىڭ حالىق اراسىندا كەڭ تاراعان «گاككۋ» ءانى شىعارماشىلىعىنىڭ شىڭى بولىپ تابىلادى. ونىڭ اندەرى نازىك، تازا ماحاببات سەزىمىنە، تەرەڭ ويعا تولى.

تۋعان ەلى ىبىرايدى ءوز جۇرەگىندە ساقتاپ، كەيبىر اندەرىن حالىق ءانى دەپ، كەيبىرىن الدەكىمدىكى دەپ الىپ قالعان. بۇل كۇندەرى اندەرى وزىنە قايتارىلىپ كەلەدى.

تاۋەلسىز قازاقستان اقىن ۇلىنا قۇشاعىن كەڭىنەن اشتى. كوكشە توپىراعىندا دۇنيەگە كەلگەن حالىق كومپوزيتورى، بۇلبۇل ءانشى، سۋىرىپ سالما اقىن ۇكىلى ىبىرايدىڭ ەسىمى بۇگىندە وسى قالاداعى اقمولا وبلىستىق فيلارمونياسىنا بەرىلدى.