اتىراۋ وبلىسىنىڭ اكىمى نۇرلان نوعايەۆقا «باتىس قازاقستان وبلىسىنىڭ قۇرمەتتى ازاماتى» اتاعى بەرىلدى، دەپ حابارلايدى Qamshy.kz اقپارات اگەنتتىگى اكىمنىڭ باسپا ءسوز قىزمەتىنە سىلتەمە جاساپ.

بۇل ۇسىنىس باتىس قازاقستان وبلىستىق ءماسليحاتىنىڭ كەزەكتەن تىس XIII سەسسياسىندا قارالىپ، ونى ءماسليحات دەپۋتاتتارى ءبىراۋىزدان قولدادى.

«قۇرمەت» جانە «پاراسات» وردەندەرىمەن ماراپاتتالعان نۇرلان نوعايەۆ 2007-2016 جىلدارى باتىس قازاقستان وبلىسى اكىمىنىڭ ءبىرىنشى ورىنباسارى، وبلىس اكىمى قىزمەتتەرىن اتقارعان، 2016 جىلدىڭ ناۋرىزىنان بەرى اتىراۋ وبلىسىنىڭ اكىمى.

ايتا كەتەلىك، ءماسليحاتتىڭ وسى سەسسياسىندا «باتىس قازاقستان وبلىسىنىڭ قۇرمەتتى ازاماتى» اتاعى ۇوس ارداگەرى «II دارەجەلى ۇلى وتان سوعىسى»، «ەڭبەك قىزىل تۋ»، «قۇرمەت بەلگىسى»، «قۇرمەت» وردەندەرىمەن قاتار «باتىرلىعى ءۇشىن»، «گەرمانيانى جەڭگەنى ءۇشىن»، «ستالينگرادتى قورعاعانى ءۇشىن» مەدالدارىنىڭ يەگەرى مۇحتار ءاجىعۇلوۆقا، الاشقا تانىمال اقىن اقۇشتاپ باقتىگەرەيەۆاعا، بەلگىلى قازاق ءالپينيسى، ق ر الپينيستەر قۇرامىنىڭ كاپيتانى، «قۇرمەت» وردەنىنىڭ يەگەرى ماقسوت جۇمايەۆقا دا بەرىلسىن دەگەن شەشىم قابىلداندى.