ق ر دسم قوعامدىق دەنساۋلىق ساقتاۋ كوميتەتىنىڭ ءتوراعاسى جانداربەك بەكشين تۇماۋمەن اۋىرعان كەزدە بالانى بالاباقشاعا جىبەرمەۋگە كەڭەس بەردى، ― دەپ حابارلايدى Qamshy.kz اقپارات اگەنتتىگى قازاقپاراتقا سىلتەمە جاساي وتىرىپ.
«ءبىزدىڭ ماقسات ― ەل تۇرعىندارى اراسىندا بۇل اۋرۋدىڭ الدىن الۋ. وڭتۇستىك وڭىرلەردە اۋرۋدىڭ تارالۋى ءداستۇرلى تۇردە جەلتوقساننىڭ ەكىنشى جارتىسىنان، ال سولتۇستىك وڭىرلەردە قاڭتاردىڭ ەكىنشى جارتىسىنان باستالادى»، - دەپ توقتالدى بەكشين استاناداعى №9 ەمحانادا وتكەن باسپا ءسوز ءماسليحاتىندا.
ونىڭ سوزىنە قاراعاندا، جىل سايىن تۇماۋ مەن ءجىتى رەسپيراتورلىق ۆيرۋستىق ينفەكسيالاردىڭ 1 ميلليونعا دەيىن جاعدايلارى تىركەلەدى، ال وتكەن جىلى 600 مىڭ جرۆي جاعدايى بايقالدى.
«سوندىقتان دا ءبىز الدىن الۋ شارالارىنا ەرەكشە ءمان بەرۋىمىز كەرەك. جرۆي توبىنا توقتالاتىن بولساق، ادامدار كوپ جينالاتىن جەرلەرگە بارۋدى شەكتەۋ كەرەك، اسىرەسە، بالالاردى. اتاپ ايتقاندا، اۋاسى جەلدەتىلمەيتىن عيماراتتارعا بارۋدان تارتىنۋ قاجەت. وسىعان بايلانىستى بالالار اعزاسىن دارۋمەندەرمەن بارىنشا تولىقتارعان ابزال»، - دەيدى باس مەملەكەتتىك سانيتارلىق دارىگەر.
بۇل رەتتە ءبىرىنشى كەزەكتە ءدارىحانالاردا ساتىلاتىن جاساندى دارۋمەندەردى، سونداي-اق جەمىس-جيدەكتەردى كوبىرەك تۇتىنعان دۇرىس.
«بالالارعا ليمون، انار، كيۆي سەكىلدى ونىمدەردى بەرۋ كەرەك. مۇنىمەن قوسا يتمۇرىن، قارا قاراقات قايناتپالارىن ىشكەن دۇرىس، ال تۇنگە تابيعي فيتونسيد بولىپ سانالاتىن سارىمساق پەن پيازدى تۇتىنۋعا كەڭەس بەرەمىز»، - دەپ توقتالدى بەكشين.
بۇدان بولەك ول جەكە گيگيەنا ەرەجەسىنە ەرەكشە ءمان بەرۋ، عيماراتتىڭ ءىشىن ءجيى جەلدەتۋ قاجەتتىگىن باسا ايتتى. باس مەملەكەتتىك سانيتارلىق دارىگەر وتباسىندا تۇماۋعا شالدىققان ادام پايدا بولسا نە ىستەۋ كەرەكتىگىن ايتتى. «تۇماۋ بەلگىسى بار ادام پايدا بولسا، باستى تالاپ - ۇيدە قالۋ. بالاباقشاعا، مەكتەپكە، سونداي-اق جۇمىسقا بارۋدىڭ قاجەتى جوق. بۇل رەتتە «تۇماۋمەن اۋىرعان ادامنىڭ وندىرىستە پايداسىنان گورى زيانى باسىم» دەگەن تۇسىنىكتى نازارعا العان ءجون. بۇدان كەيىن ادامدار تۇماۋدى كوبىنەسە قوعامدىق كولىكتە دە جۇقتىرادى. سوندىقتان دارىگەردى نەمەسە ۋچاسكەلىك كومەكتى شاقىرتقان ابزال»، - دەدى جانداربەك بەكشين.
ونىڭ ايتۋىنشا، تۇماۋ تارالاتىن كەزەڭدە حالىققا قىزمەت كورسەتۋ مەن جەدەل جاردەم جۇمىسى كۇشەيتىلەتىن بولادى. بۇدان بۇرىن حابارلانعانداي، الداعى دۇيسەنبىدەن قازاقستاندا تۇماۋعا قارسى جاپپاي ۆاكسينا ەگۋ شارالارى باستالادى.
