الماتى تۇبىندە اپاتقا ۇشىراعان ساناۆياسيا ۇشاعىنىڭ بورتىندا بولعان دارىگەرلەردىڭ اتى-جوندەرى انىقتالدى، - دەپ حابارلايدى Qamshy.kz اقپارات اگەنتتىگى ق ر دەنساۋلىق ساقتاۋ مينيسترلىگىنىڭ باسپا ءسوز قىزمەتىنە سىلتەمە جاساپ.

ۆەدومستۆو وكىلدەرىنىڭ مالىمەتىنشە، 3 قازاندا كەشكى ۋاقىتتا الماتىدان شىمكەنتكە دارىگەرلەر بريگاداسى اۋىر جاعدايدا جاتقان جۇكتى ايەلگە كومەكتەسۋ ءۇشىن اتتانعان. 

ولاردىڭ ايتۋىنشا، الماتىدان سانيتارلىق اۆياسيا بريگاداسى ساعات 18.39-دا ۇشىپ شىققان. بورتتا اكۋشەريا، گينەكولوگيا جانە پەريناتالوگيا عىلىمي ورتالىعىنىڭ پروفەسسورى، دارىگەر اكۋشەر-گينەكولوگ پاتسايەۆ تالعات اناپي ۇلى مەن كارديولوگيا جانە ىشكى اۋرۋلار عىلىمي-زەرتتەۋ ينستيتۋتىنىڭ رەانيماتولوگ دارىگەرى ارتىقبايەۆ جانىبەك تۇكەن ۇلى بولعان.

بورتتا ناۋقاستىڭ بولماعانى ايتىلادى. ۇشۋ رەسپۋبليكالىق سانيتارلىق اۆياسيا ورتالىعى مەن East Wing اۋەكومپانياسىنىڭ كەلىسىمشارتى بويىنشا ان-28 ۇشاعىمەن جۇزەگە اسىرىلعان. بورتپەن بايلانىس ۇزىلگەن. ۇشاق الماتى تۇبىندە تابىلعان. بەس ادامنىڭ ءمايىتى تابىلعان.  

"ق ر دەنساۋلىق ساقتاۋ مينيسترلىگى قىزمەتتىك مىندەتىن اتقارۋ كەزىندە قازا تاپقان مەديسينالىق جۇمىسشىلاردىڭ وتباسىلارىنا كوڭىل ايتادى جانە مورالدىق ءارى ماتەريالدىق كومەك كورسەتەدى"، - دەيدى ۆەدومستۆا وكىلدەرى. 

قازا تاپقان قالعان ۇشەۋى، ازاماتتىق اۆياسيا كوميتەتى وكىلدەرىنىڭ حابارى بويىنشا، ەكيپاجدىڭ مۇشەلەرى بولعان. ولار - قىرعىزستان ازاماتى، اۋە كەمەسىنىڭ كومانديرى گ.ن.سوي، ەكىنشى پيلوت، قازاقستان ازاماتى ە.كۋتافين.

ەسكە سالا كەتسەك، 3 قازاندا East Wing اۋەكومپانياسىنىڭ ان-28 ۇشاعى ۇشىپ شىققاننان كەيىن 12 مينۋت وتكەندە راداردان جوعالىپ، كەيىن ۇشاق الماتى تۇبىندە ورتەنىپ جاتقان جەرىنەن تابىلعان. بورتتا بولعان بەس ادام قازا تاپقان.