استانا قالاسىنىڭ كاسىپكەرلىك جانە ونەركاسىپ باسقارماسى قالامىزدا قايدان وتىن ساتىپ الۋعا بولاتىنىڭ ايتتى، دەپ حابارلايدى Qamshy.kz اقپارات اگەنتتىگى استانا قالاسى اكىمدىگىنىڭ مەديا ورتالىعىنا سىلتەمە جاساپ.

استانا قالاسىنىڭ كاسىپكەرلىك جانە ونەركاسىپ باسقارماسى ب ا ق بەتتەرىندە جانە الەۋمەتتىك جەلىلەردە ەلوردامىزدا كومىر تاپشىلىعى سەزىلىپ جاتىر دەگەن اقپاراتتى جوققا شىعاردى.

«ءقازىر كەي ب ا ق پەن الەۋمەتتىك جەلىلەردە باس قالادا كومىر تاپشىلىعى سەزىلۋدە دەگەن اقپارات تاراپ جاتىر جانە ول قاتتى وتىننىڭ قىمباتتاۋىنا سەبەپ بولۋدا. ايتا كەتەيىك، قازىرگى تاڭدا قالا بويىنشا كومىر تاپشىلىعى جوق جانە بولۋى دا مۇمكىن ەمەس»، - دەپ حابارلادى استانا قالاسى اكىمدىگىنىڭ مەديا ورتالىعىنا قالالىق كاسىپكەرلىك جانە ونەركاسىپ باسقارماسى.

كومىردى تومەندەگى مەكەنجايلار بويىنشا ساتىپ الۋعا بولادى:

«جىلۋ نس 2030» ج ش س (استانا، گەرسەن كوش، 6/1، تەل.: 43 51 42؛ «جىلى الەم kz» ج ش س (ابايا-جۇبانوۆ قيىلىسى، مياسوكومبينات ايماعى)؛ «استانا ينۆەست» ج ش س (پريدوروجنايا-1 كوش، گەرسەن كوش، 6/2، تەل.: 48 67 61)؛ «سيەۆەر ەنەرگو» ۋگولسناب» ج ش س، (ليتەينايا-1 كوش)؛ «ۇمار كز» ج ش س (دۋلاتوۆ كوش،182 (سەنتر بەتون).

اتالمىش كاسىپورىندارعا كومىر مىنا كەن ورىندارىنان جەتكىزىلەدى: «قاراجار» (شىعىس قازاقستان وبلىسى)، «بوگاتىر» (پاۆلودار وبلىسى)، «مايكوبە» جانە «شۇباركول» (قاراعاندى وبلىسى).

ورتا ەسەپپەن 1 توننا كومىر 11 800 تەڭگە تۇرادى.

«قالامىزدا كومىر جەتكىلىكتى جانە اپتا سايىن تولىقتىرىلىپ وتىرادى»، - دەپ حابارلادى استانا قالاسىنىڭ كاسىپكەرلىك جانە ونەركاسىپ باسقارماسى.