استانادا 27-29 قازان ارالىعىندا قازاق كۇرەسىنەن 40 مەملەكەتتىڭ قاتىسۋىمەن الەم چەمپيوناتى وتەدى،- دەپ Qamshy.kz اقپارات اگەنتتىگى قازاقپاراتقا سىلتەمە جاساي وتىرىپ جازادى.

«قازاق كۇرەسى حالىقارالىق فەدەراسياسىنىڭ» مالىمەتىنشە، ەلىمىزدىڭ ۇلتتىق ويىنىنا الەمنىڭ تۇكپىر-تۇكپىرىنەن 40 مەملەكەتتىڭ سپورتشىلارى قاتىسادى. ولاردىڭ قاتارىندا اقش، جۇڭگو، اۆستراليا، ءۇندىستان، ليتۆا، رەسەي، بەلگيا، كامەرۋن باستاعان ەلدەردىڭ ەڭ تاڭداۋلى بالۋاندارى بار. قازاق كۇرەسى ەجەلگى سپورت تۇرلەرىنە جاتادى. بۇگىنگى تاڭدا ونىڭ كۇن وتكەن سايىن تانىمالدىعى ارتىپ كەلەدى. ءتىپتى، قازاق كۇرەسى ءتۇرلى توي مەن سالتاناتتى ءىس-شارالاردا وتكىزىلىپ ءجۇر. 2016 جىلدان باستاپ يۋنەسكو ونى ماتەريالدىق ەمەس مادەني مۇرا تىزىمىنە ەنگىزگەن. چەمپيونات 8 سالماق دارەجەسى جانە ابسوليۋتتىك دارەجە بويىنشا وتەدى.   27 قازاندا «حان شاتىر» ويىن-ساۋىق ورتالىعىندا سپورتشىلاردىڭ سالماق ولشەۋ جانە جەرەبە تاستاۋ ءراسىمى وتسە، 28-29 قازان كۇندەرى «بارىس-ارەنا» مۇزايدىنى سارايىندا جارىس وتەدى. بىرىنشىلىكتىڭ العاشقى كۇنى سپورتشىلار 55، 90، 100 جانە +100 كەلىدە بەلدەسسە، ەكىنشى كۇنى 60، 66، 74، 82 جانە ابسوليۋتتىك سالماق دارەجەسى بويىنشا مىقتىلار انىقتالماق. ايتا كەتەيىك، «قازاق كۇرەسى حالىقارالىق فەدەراسياسى» زتب 2017 جىلدىڭ 24 ناۋرىزىندا استانا قالاسىنىڭ ادىلەت دەپارتامەنتىندە تىركەلگەن. 2017 جىلعى اقپاندا 35 مەملەكەت وكىلدەرىنىڭ قاتىسۋىمەن استانا قالاسىندا وتكەن قازاق كۇرەسى حالىقارالىق فەدەراسياسىنىڭ كونگرەسىندە فەدەراسيا جۇمىسى نىقتالىپ، پرەزيدەنتى رەتىندە قانات بوزىمبايەۆ تاعايىندالعان بولاتىن.