نۇرسۇلتان نازاربايەۆ «جۇبانوۆتار الەمى» اتتى جاڭا ورتالىقتى ارالاپ كوردى دەپ حابارلايدى Qamshy.kz اقپارات اگەنتىگى اقورداعا سىلتەمە جاساي وتىرىپ.

ورتالىق اتاقتى جۇبانوۆتار اۋلەتىنىڭ كورنەكتى تۇلعالارىنىڭ شىعارماشىلىق مۇراسىن دارىپتەۋ، سونداي-اق دارىندى بالالاردى وقىتۋ ماقساتىمەن سالىندى.  

مەملەكەت باسشىسىنا بۇل نىساننىڭ قۇرىلىسى جەكە ادامداردىڭ قارجىسى ارقىلى جۇرگىزىلگەنى باياندالدى.

قازاقستان پرەزيدەنتى ەلىمىزدىڭ كورنەكتى عىلىم جانە ونەر قايراتكەرلەرى – جۇبانوۆتاردىڭ ءومىرى مەن شىعارماشىلىعىنا ارنالعان مۋزەيدى ارالاپ كوردى.

بۇدان بولەك، ەلباسى وبلىستىڭ جۇرتشىلىق وكىلدەرىمەن كەزدەستى.

نۇرسۇلتان نازاربايەۆ «رۋحاني جاڭعىرۋ» اتتى باعدارلامالىق ماقالاسىندا اتاپ كورسەتىلگەن جاڭعىرۋ ۇدەرىسىنىڭ ەرەكشەلىكتەرىنە توقتالدى.

– الەم كوز الدىمىزدا وزگەرۋدە، ءبىز سول وزگەرىستەردىڭ ورتاسىندامىز. جاڭا عىلىمدار پايدا بولىپ، تىڭ كوزقاراس قالىپتاسۋدا. بارلىق رەفورمالار، سونىڭ ىشىندە قوعامدىق سانانى جاڭعىرتۋ ۇدەرىسى زامانداستارىمىزدى جارقىن بولاشاققا دايىنداۋ ءۇشىن جاسالۋدا، – دەدى قازاقستان پرەزيدەنتى. 

سونداي-اق، ەلباسى استانا، الماتى، شىمكەنت قالالارىمەن قاتار اقتوبە دە يننوۆاسيا ورتالىعى بولىپ، وندىرىستىك، قارجىلىق جانە ادامي رەسۋرستاردى تارتاتىن فاكتورعا اينالۋعا ءتيىس ەكەندىگىن ەرەكشە اتاپ ءوتتى.

«قازاقستاندا ءىرى قالالاردىڭ بولعانى دۇرىس. الماتى حالقىنىڭ سانى 1 ميلليون 300 مىڭنان استى. استانا حالقى كۇن سايىن ارتىپ كەلەدى. شىمكەنت ميلليونعا، اقتوبە حالقىنىڭ سانى جارتى ميللونعا جەتتى. تاۋەلسىزدىكتىڭ العاشقى جىلدارىنان بەرى اقتوبە حالقىنىڭ سانى ەكى ەسەگە ءوستى. بۇرىن 240 مىڭ بولسا، ءقازىر 500 مىڭعا جۋىقتادى. مەن بۇل قالادا ميلليون ادامنىڭ تۇرعانىن قالايمىن. جاڭا ىقشام اۋداندار سالىنىپ جاتىر. ادامدار بۇل وڭىرگە كوشىپ كەلىپ، ءومىر سۇرگىسى كەلەدى. بۇل جەردە مۇمكىندىك بار. بۇگىن اقتوبە فەرروقورىتپا زاۋىتىندا بولدىم. جاڭا زاۋىتتا 700 ادام جۇمىس ىستەپ جاتىر. زاۋىت - اقتوبە وبلىسىنىڭ ەڭ ءىرى ءوندىرىس ورىندارىنىڭ ءبىرى. ال اقتوبە رەلس-ارقالىق زاۋىتى قازاقستانداعى، ورتالىق ازياداعى جالعىز ءوندىرىس ورنى. ءبىز يندۋستريالدى ءوندىرىس ورىندارىن سالىپ، زاۋىت، فابيريكالاردىڭ قۇرىلىسىن جۇرگىزىپ جاتىرمىز. جول سالىنىپ جاتىر. اقتوبەدە گاز بار، قىتايدان ەۋروپاعا باعىتتالعان جول سىزدەر ارقىلى ءوتىپ جاتىر. كولىك بۇل - ءومىر. كولىك قوزعالىسى بار اۋماقتا اۋىل بار، جۇمىس تابىلادى. ءارى قاراي بۇل باعىتتاعى جۇمىس جالعاسادى. قازاقستاننىڭ بارلىق ايماعى جولمەن قامتىلادى. جول بۇل - دامۋ»، - دەدى مەملەكەت باسشىسى.

كەزدەسۋ سوڭىندا نۇرسۇلتان نازاربايەۆ وبلىس تۇرىندارىنا اماندىق پەن باق-بەرەكە تىلەپ، ەلىمىزدىڭ وركەندەۋى جولىندا تابىسقا جەتۋلەرىنە نيەتتەستىگىن ءبىلدىردى.