استانادا نايب ءمۇفتي سەرىكباي قاجى ورازدىڭ توراعالىعىمەن وتكەن قازاقستان مۇسىلماندارى ءدىني باسقارماسى ورتالىق اپپاراتىنىڭ كەزەكتى جينالىسىندا وسىنداي تاپسىرما بەرىلدى دەپ حابارلايدى Qamshy.kz اقپارات اگەنتتىگى قمدب باسپا ءسوز قىزمەتىنە سىلتەمە جاساپ. ەلىمىز بويىنشا ۋاعىز-ناسيحات جۇمىستارىنىڭ ءبىرىڭعاي ءتارتىبى مەن ادەبى تۋرالى ارنايى ەرەجەنى ازىرلەۋ قمدب ۋاعىز-ناسيحات بولىمىنە جۇكتەلدى.

«وزدەرىڭىز جاقسى بىلەسىزدەر، الەۋمەتتىك جەلىلەر مەن ەلەكتروندى اقپارات قۇرالدارىندا كەيبىر تۇلعالار ۋاعىز ايتۋ بارىسىندا قوعامىمىزدا قالىپتاسقان قۇندىلىقتاردى، حالقىمىزدىڭ سان عاسىرلىق ءداستۇرى مەن عۇرپىن، جۇرتىمىزدىڭ باي مۇرالارىن ەسكەرمەۋدە. سونىمەن قاتار، ءمۇفتيات عالىمدارى ايتۋى ءتيىس ءدىني تەرەڭ ماسەلەلەر توڭىرەگىندە ۇكىم بەرىپ، ءپاتۋاسىن شىعارىپ جاتىر. سونىڭ سالدارىنان قوعامدا ازاماتتار مەن جاماعات اراسىندا تۇسىنبەۋشىلىكتەر كورىنىس تاپتى. بۇل ماسەلەنى دەر كەزىندە قولعا الىپ، ۋاعىز ايتۋدىڭ ءبىرىڭعاي ادەبى، ءتارتىبى تۋرالى ەرەجە قابىلداۋىمىز كەرەك»، – دەدى قمدب ءتوراعا ورىنباسارى، «ازىرەت سۇلتان» مەشىتىنىڭ باس يمامى سەرىكباي قاجى وراز.

اتالعان قۇجات قمدب بەكىتكەن تاقىرىپتار بويىنشا ۋاعىز-ناسيحات جۇمىستارىنىڭ جۇرگىزىلۋىنە جول اشپاق.