كۇيىك - تەرىگە، كەيدە تىندەرگە، بۇلشىق ەتكە جانە سۇيەكتەرگە ءورت، ەلەكتر نەمەسە حيميالىق زاتتاردىڭ اسەرىنەن كەلەتىن زيان. ىستىق بۋ نەمەسە سۇيىقتىقتىڭ اسەرىنەن دە ادام كۇيىپ قالۋى مۇمكىن. كۇيىكتىڭ الدىن الۋ، العاشقى كومەك تۋرالى ءتۇسىندىرۋ جۇمىستارى وڭىردە ءجيى وتكىزىلىپ كەلەدى.
باتىس قازاقستان وبلىستىق توتەنشە جاعدايلار دەپارتامەنتى «اپاتتار مەديسينالىق ورتالىعى» فيليالىنىڭ فەلدشەرى زەرگۇل قۇرمانعازييەۆانىڭ ايتۋىنشا، تەرىنىڭ جانە تىندەردىڭ زاقىمدانۋ دارەجەسىنە بايلانىستى كۇيىك بىرنەشە تۇرگە بولىنەدى ەكەن. ءبىرىنشى دارەجەلى كۇيىككە تەرىنىڭ بەتكى قاباتىنىڭ زاقىمدانۋى جاتادى. ءبىرىنشى دارەجەلى كۇيىكتەر ىستىق كۇنگە كۇيىپ كەتۋدەن نەمەسە قايناعان سۇيىقتىقتىڭ، ىستىق بۋدىڭ اسەرى ناتيجەسىندە دە پايدا بولادى. ال ەكىنشى دارەجەلى كۇيىكتەر تەرىنىڭ ەكى جوعارعى قاباتىنا اسەر ەتەدى. تەرى قىزارادى، ىسىنەدى، ءجيى كوبىكتەنەدى جانە كوبىك پايدا بولادى. مۇنداي كۇيىكتەردىڭ اۋىرۋى وتە كۇشتى بولۋى مۇمكىن. ەگەر دەنە ايماعىنىڭ جارتىسىنان كوبى زاقىمدالعان بولسا، وندا ادام ءولىپ كەتۋى ابدەن مۇمكىن. كۇيىك التى شارشى سانتيمەتردەن ارتىق بولسا، دارىگەرگە جولىعۋ كەرەك. تەرىنىڭ تەرەڭ زاقىمدانۋى، تىندەردىڭ بۇلشىق ەتتەردىڭ، سۇيەكتىڭ ، نەرۆتەردىڭ زاقىمدانۋى ءۇشىنشى دارەجەلى كۇيىككە جاتادى. بۇل كۇيىكتەر وتە اۋىر جانە اۋىرسىنۋى دا قاتتى بولادى. ءۇشىنشى دارەجەلى كۇيىكتەن سوڭ دەنەدە تىرتىقتار قالۋى مۇمكىن. ماماننىڭ ايتۋىنشا كۇيىك دارەجەلەرى ورىن العاندا العاشقى مەديسينالىق كومەك كورسەتۋدىڭ ماڭىزى زور. ينفەكسيانى بولدىرماۋ ءۇشىن اسەپتيكالىق تاڭعىشتاردى قولدانىپ، شوكتىڭ الدىن الۋ كەرەك. سونداي-اق كۇيگەن كيىمدەردى ءسوندىرىپ، ونى ادام ۇستىنەن شەشۋ قاجەت.كۇيىپ دەنەگە جابىسىپ قالعان كيىمدى جىرتىپ الۋعا بولمايدى، جاراقاتتىڭ ۇستىندەگىسىن قالدىرىپ، اينالاسىنداعىسىن عانا جىرتىپ الىپ تاستاۋ كەرەك. ەگەر سىرتتا سۋىق مەزگىل بولسا، وندا كيىم-كەشەكتى جابىرلەنۋشىدەن شەشۋ ءقاۋىپتى، بۇل شوكتىڭ پايدا بولۋىنا جانە جاعدايدىڭ ناشارلاۋىنا اكەلەدى ەكەن. العاشقى كومەك كورسەتەتىن ادام كۇيگەن جەرلەرگە ينفەكسيالاردىڭ ءتۇسۋىن الدىن الۋ ءۇشىن قۇرعاق اسەپتيكالىق تاڭعىشتاردى قولدانۋ ماڭىزدى.
گۇلىم اقاپ،
باتىس قازاقستان وبلىسى
