دايش تەرروريستىك توبى تۇرعىندارعا قاتىستى قانداي قاتىگەز ارەكەتتەردى قولداناتىنى بەلگىسىز. سيريادا رەپورتاج جاساۋ وتە ءقاۋىپتى. سوندىقتان جۋرناليستەر دايش باسىپ العان جەرلەرگە كوپ بارا بەرمەيدى.  الايدا ءوز ءومىرىن قاتەرگە تىگىپ سيرياداعى جاعداي تۋرالى اقپاراتتى جۋرناليستەرگە جەتكىزىپ وتىرعان تۇرعىندار بار. بي-بي-سي كوررەسپوندەنتى سوڭعى ءۇش ايدا راككا تۇرعىنىمەن حابارلاسىپ تۇردى. ول كۇندەلىك جازادى. وندا دايش سودىرلارى باسىپ العان قالاداعى تۇرعىنداردىڭ جاعدايى باياندالادى.

كۋاگەر كۇندەلىگى (2ء-شى ءبولىم):

ول مەنى اياۋسىز ۇردى. ونىڭ كوزىنەن بۇل ارەكەتىن ماقتان تۇتاتىنىن بايقادىم.

مەن ۇيگە جەتكەندە تالىپ قالدىم. جۇكتى اپكەم باسىمنان وتكەن جاعدايدى بىلگەننەن كەيىن ۋايىمداعانى سونشالىق ءوزىن ناشار سەزىندى. ءبىز بىردەن اۋرۋحاناعا باردىق. ءبىراق اۋرۋحانا جابىق ەكەن. كوشەدە كەتىپ بارا جاتقان ادام دارىگەر كورشىسى ەكەنىن جانە ونى دايش سودىرلارى قاماۋعا الىپ، اۋرۋحاناسىن جاپقانىن ايتتى. ولار ەر ادامداردىڭ ايەلدەردى ەمدەۋىنە تىيىم سالعان. ءبىز ايەل گينەكولوگتى ىزدەدىك. ءبىراق بىزگە ۇيگە قايتىپ، دەمالۋ كەرەك ەكەنىن ايتتى.

كەيىنىرەك مەن دوسىمدى كەزدەستىردىم. ول الدەنەگە قوبالجىپ تۇرعانداي كورىندى.

«ءبىز دايش-قا قارسى جاسىرىن توپ قۇردىق. ءبىز قانپەزەرلەردىڭ قالامىزدا نە ىستەپ جۇرگەنىن بۇكىل الەمگە جەتكىزگىمىز كەلەدى» دەدى دوسىم.

جولدا تاعى مۇحاممەد ەسىمدى دوسىمدى كەزدەستىردىم. ونىڭ ءوز دۇكەنى بار. ول جولدىڭ ارعى بەتىندەگى دۇكەن يەسىن نۇسقادى. ونىمەن دايش ادامدارى سويلەسىپ تۇرعان ەدى. بىرەۋىنىڭ قولىندا ءبىر بۋما قاعاز بولدى.

«ەي، مىناۋ دۇكەننىڭ يەسى كىم؟» دەپ ايقايلادى ءبىرى. «مەن» دەپ جاۋاپ بەردى مۇحاممەد.

«ءبىز كاحتانبىز. سالىق جيناۋعا كەلدىك» دەدى ولار. اتالمىش ۇيىم كەدەيلەرگە كومەكتەسەدى، الايدا بۇل ادامدار دايش-قا ارناپ سالىق جيناپ جۇرگەندەر.

— مەن تولەۋ قاجەت سالىقتىڭ بارلىعىن تولەپ قويعانمىن

— جاپ اۋزىڭدى

— سەن بىزگە 100 مىڭ سيريالىق فۋنت تولەۋىڭ كەرەك.

بۇل وتە ۇلكەن سومما، ءبىراق مۇحاممەد تولەدى. سەبەبى دايش-تىڭ جولىن كەسكەندەردىڭ باستارىن شاۋىپ الىپ وتىرعان.

تۇندە ءۇيىمىز جارىلىستان قوزعالىپ كەتتى. جاڭالىقتاردان حالىقارالىق كواليسيا العاش رەت دايش-قا قارسى سوققى جاساعانىن ەستىدىك.

كەلەسى كۇنى تاكسي جۇرگىزۋشىسى بومبانىڭ دايش-قا تيەسىلى كوپتەگەن عيماراتقا تۇسكەنىن ايتتى. پوليسيا دايش تۋرالى اقپاراتتى جەتكىزگەندەردى ىزدەپ جاتقانىن ەسكەرتتى.

كوشەدە ءبىر توپ ادام شۇڭقىردىڭ جانىنا جينالدى. شۇڭقىردا ايەل وتىردى. ەر ادامداردىڭ ءبىرى «بۇل ايەل زينا جاسادى. سوندىقتان تاسپەن ولتىرىلەدى» دەدى ول. ونىڭ سوزدەرىن ۇشىپ بارا جاتقان ۇشاق باسىپ تاستادى. ساتۋشىلاردىڭ ءبىرى «تىعىلىڭدار، تىعىلىڭدار» دەپ ايقايلادى. بازارعا بومبا تاستالدى. كوشەدە بولشەكتەنگەن ادامداردىڭ دەنەسى جاتتى. كوبىنە بەيبىت تۇرعىندار زارداپ شەكتى. بۇل تەرروريستەردىڭ كوزىن جويۋعا ارنالعان رەسەيلىك ۇشاق ەدى. قالاداعا تەرروريزمنەن قيىندىق كورىپ وتىرعانىمىز از با ەدى؟! ەندى بىزدە اۋەدەن دە سوققى جاسايىن دەدى مە؟