بۇگىن موڭعوليانىڭ پرەمەر-مينيسترى ۋحنااگيين حۋرەلسۋح بۇركىتشى قازاق قىزى ايشولپان نۇرعايىپتى قابىلدادى، دەپ حابارلايدى Qamshy.kz اقپارات اگەنتتىگى.

پرەمەر-مينيستر اتا ءداستۇر ارقىلى موڭعوليانى الەمگە ناسيحاتتاعان ايشولپانعا قولداۋ ءبىلدىرىپ، العىس ايتتى.

ون جاسىنان قىران باپتاعان قازاق قىزى تۋرالى "بۇركىتشى" ءفيلمى تۇسىرىلگەن. اتالمىش فيلم 2 قاراشا كۇنى نيۋ-يوركتە وتكەن كينوفەستيۆالدە "ازيا قۇرلىعىن وزگەرتەتىن ازامات” اتتى سىيلىققا يە بولعان ەدى.

بۇدان بۇرىن ءانشى Sia موڭعوليادان بۇركىتشى قازاق قىزى ايشولپان نۇرعايىپ تۋرالى فيلمگە سۋندترەك بولىپ تابىلاتىن «Angel by the Wings» اتتى جاڭا ءانىن جازعانى حابارلانعان.

فيلم اتا-بابا ءداستۇرىن جالعاستىرعان بۇركىتشىلىك ونەردى مەڭگەرگەن قازاق قىزى ايشولپان نۇرعايىپ جايلى. بۇل نەگىزىنەن ەرلەرگە ءتان كاسىپ. الەمدە بۇل ونەرمەن تەك 2 نازىك جاندى عانا شۇعىلدانادى ەكەن. ولاردىڭ ەكەۋى دە - قازاق. ەكىنشىسى قازاقستاندا تۇراتىن بۇركىتشى ماقپال ءابدىرازاقوۆا.

ايشولپاندى ۇياڭ، نازىك ءارى باتىر قىز دەگەن North West Herald امەريكالىق باسىلىمى «بۇل فيلم كورەرمەندى اي­شولپاننىڭ الەمىنە اپارادى. ايشولپان وسكەندە دارىگەر بولۋدى ارماندايدى. ءبىراق بۇركىت­شىلىكتى تاستاعىسى كەل­مەيدى. «بۇركىت­ءشى قىز» – جاستارعا شابىت بەرەتىن، اسەرلى پەيزاجىمەن جۇرەكتەرگە جىلۋ بەرەتىن فيلم» دەپ جازعان.

قابىلداۋ بارىسىندا بۇركىتشى قىز حارۆارد، لوندون ۋنيۆەرسيتەتتەرىنەن شاقىرۋ العاندىقتان، بولاشاقتا دارىگەر بولعىسى كەلەتىنىن ۇكىمەت باسشىسىنا ءبىلدىردى.