استانادا قازاقستان رەسپۋبليكاسىنىڭ مەملەكەتتىك حاتشىسى گۇلشارا ءابدىقالىقوۆانىڭ قاتىسۋىمەن «رۋحاني جاڭعىرۋ» باعدارلاماسى اياسىندا تۇڭعىش رەت ەلدەگى ۇزدىك ۇكىمەتتىك ەمەس ۇيىمدارعا (ۇەۇ) سىياقى تاپسىرۋ سالتاناتتى ءراسىمى ءوتتى دەپ حابارلايدى Qamshy.kz اقپارات اگەنتتىگى.

ءىس-شاراعا سونداي-اق پارلامەنت دەپۋتاتتارى، مەملەكەتتىك ورگاندار مەن ۇەۇ وكىلدەرى جانە قالىڭ جۇرتشىلىق قاتىستى.

مەملەكەتتىك حاتشى ءوز قۇتتىقتاۋىندا ەلباسى ن.ءا.نازاربايەۆتىڭ: «ازاماتتىق قوعام، سونىڭ ىشىندە ۇكىمەتتىك ەمەس ۇيىمدار – دەموكراتيانىڭ اجىراعىسىز بولشەگى» دەگەن ءسوزىن اتاپ ءوتتى.

الەۋمەت بەلسەندىلىگىن ارتتىرمايىنشا قوعامدىق سانانى جەتىلدىرۋ مۇمكىن ەمەس. ۇكىمەتتىك ەمەس سەكتور وسى ءۇردىستىڭ اجىراعىسىز بولشەگى بولىپ تابىلادى.

تاۋەلسىزدىك جىلدارىندا قازاقستاندىق ۇەۇ جاقسى تاجىريبە جينادى. بۇگىندە ەلىمىزدە 19 680 ۇەۇ تىركەلگەن. ولار اسىرەسە استانادا، الماتىدا، وڭتۇستىك قازاقستان، قاراعاندى جانە قىزىلوردا وبلىستارىندا بەلسەندىرەك. وندا 29 مىڭ ادام جۇمىسپەن قامتىلىپ وتىر. مەملەكەتتىك الەۋمەتتىك تاپسىرىس پەن مەملەكەتتىك گرانتتار قولدانىلادى. مەملەكەتتىك الەۋمەتتىك تاپسىرىس اياسىندا سوڭعى 2 جىلدا ۇەۇ قۇنى 23 ملرد. تەڭگەدەن جوعارى 4 مىڭنان استام الەۋمەتتىك جوبا جۇزەگە اسىرىلدى. 2016 جىلدان باستاپ جوبالاردى مەملەكەتتىك گرانت ارقىلى قارجىلاندىرۋ ءادىسى ەنگىزىلدى. وسى ۋاقىت ىشىندە جالپى قۇنى 800 ملن. تەڭگەدەن اساتىن 70-كە جۋىق جوبا ىسكە اسىرىلدى.

سىياقى ۇەۇ-عا رەسپۋبليكالىق، سالالىق جانە وڭىرلىك دەڭگەيدەگى الەۋمەتتىك ماسەلەلەردى شەشكەنى ءۇشىن 15 نوميناسيا بويىنشا بەرىلەدى. ءار نوميناسيانىڭ سىياقى مولشەرى – 4،5 ملن. تەڭگە.

بارلىعى 230 ءوتىنىم كەلىپ ءتۇستى. ەڭ كوپ ءوتىنىم مىنا باعىتتار بويىنشا تىركەلدى: حالىقتىڭ الەۋمەتتىك تۇرعىدان وسال توپتارىن قولداۋ – 53 ءوتىنىم نەمەسە 23%، جاستار ساياساتى مەن بالالار باستامالارىن قولداۋ – 28 ءوتىنىم نەمەسە 12،2%، ازاماتتار مەن ۇيىمدار قۇقىقتارىن، زاڭدى مۇددەلەرىن قورعاۋ – 18 ءوتىنىم نەمەسە 7،8%، قوعامدىق كەلىسىم مەن  جالپىۇلتتىق بىرلىكتى نىعايتۋ – 18 ءوتىنىم نەمەسە 7،8%.

58 ۇەۇ سىياقى يەگەرى اتاندى. ولاردىڭ اراسىندا – «ارداگەر» قوعامدىق بىرلەستىگى، قازاقستان رەسپۋبليكاسى پرەزيدەنتىنىڭ «بولاشاق» حالىقارالىق ستيپەندياسى ستيپەندياتتارى قاۋىمداستىعى، «جەنسكيي لۋچ» قوعامدىق بىرلەستىگى، «پراۆو» قوعامدىق قورى، «Enactus Kazakhstan» جەكەمەنشىك قورى جانە باسقا ۇيىمدار بار.      

ءىس-شارا اياسىندا ەلىمىزدىڭ مايتالمان ونەرپازدارىنىڭ قاتىسۋىمەن كونسەرتتىك باعدارلاما ءوتتى.