ءىس-شاراعا پارلامەنت دەپۋتاتتارى، مەملەكەتتىك ورگاندار مەن ۇكىمەتتىك ەمەس ۇيىمداردىڭ وكىلدەرى جانە قالىڭ جۇرتشىلىق قاتىستى.

گۇلشارا ءابدىقالىقوۆا قۇتتىقتاۋ سوزىندە مەملەكەت باسشىسى «ازاماتتىق قوعام، سونىڭ ىشىندە ۇكىمەتتىك ەمەس ۇيىمدار – دەموكراتيانىڭ اجىراماس بولىگى» دەپ اتاپ وتكەنىن ايتتى.

الەۋمەتتىك ورتانىڭ بەلسەندىلىگىن ارتتىرمايىنشا قوعامدىق سانانى جاڭعىرتۋ مۇمكىن ەمەس. ۇكىمەتتىك ەمەس سەكتوردى نىعايتۋ وسى ۇدەرىستىڭ اجىراماس بولىگى بولىپ سانالادى.

تاۋەلسىزدىك جىلدارىندا قازاقستاندىق ۇەۇ جاقسى تاجىريبە جيناقتادى. بۇگىندە ەلىمىزدە 19 680 ۇەۇ تىركەلگەن. ولار كوبىنە استانا مەن الماتى قالالارىندا، وڭتۇستىك قازاقستان، قاراعاندى جانە قىزىلوردا وبلىستارىندا بەلسەندى جۇمىس جۇرگىزۋدە. ۇكىمەتتىك ەمەس ۇيىمداردا 29 مىڭنان استام ادام جۇمىسپەن قامتىلعان. مەملەكەتتىك الەۋمەتتىك تاپسىرىس پەن مەملەكەتتىك گرانتتار بار. مەملەكەتتىك الەۋمەتتىك تاپسىرىس اياسىندا سوڭعى 2 جىلدا ۇەۇ قۇنى 23 ميلليارد تەڭگەدەن اساتىن 4 مىڭنان استام الەۋمەتتىك جوبانى ىسكە اسىردى. 2016 جىلدان باستاپ جوبالاردى مەملەكەتتىك گرانت ارقىلى قارجىلاندىرۋ ءادىسى ەنگىزىلدى. وسى ۋاقىت ىشىندە جالپى قۇنى 800 ميلليون تەڭگەدەن اساتىن 70-كە جۋىق جوبا ىسكە اسىرىلدى.

ۇكىمەتتىك ەمەس ۇيىمدارعا ارنالعان سىيلىقتار رەسپۋبليكالىق، سالالىق جانە وڭىرلىك دەڭگەيدەگى الەۋمەتتىك ماسەلەلەردى شەشۋگە اتسالىسقانى ءۇشىن 15 نوميناسيا بويىنشا بەرىلەدى. ءار نوميناسياداعى سىيلىقتىڭ مولشەرى – 4،5 ميلليون تەڭگە.

بارلىعى 230 ءوتىنىم كەلىپ ءتۇستى. ەڭ كوپ ءوتىنىم مىنا باعىتتار بويىنشا تىركەلدى: حالىقتىڭ الەۋمەتتىك تۇرعىدان وسال توپتارىن قولداۋ – 53 ءوتىنىم نەمەسە 23 پايىز، جاستار ساياساتى مەن بالالار باستاماسىن قولداۋ – 28 ءوتىنىم نەمەسە 12،2 پايىز، ازاماتتار مەن ۇيىمداردىڭ قۇقىقتارىن، زاڭدى مۇددەلەرىن قورعاۋ – 18 ءوتىنىم نەمەسە 7،8 پايىز، قوعامدىق كەلىسىم مەن جالپىۇلتتىق بىرلىكتى نىعايتۋ – 18 ءوتىنىم نەمەسە 7،8 پايىز.

58 ۇكىمەتتىك ەمەس ۇيىم سىيلىق يەگەرى اتاندى. ولاردىڭ اراسىندا – «ارداگەر» قوعامدىق بىرلەستىگى، «قازاقستان رەسپۋبليكاسى پرەزيدەنتىنىڭ «بولاشاق» حالىقارالىق ستيپەندياسى ستيپەندياتتارى قاۋىمداستىعى» قوعامدىق بىرلەستىگى، «جەنسكيي لۋچ» قوعامدىق بىرلەستىگى، «پراۆو» قوعامدىق قورى، «Enactus Kazakhstan» جەكەمەنشىك قورى جانە باسقا ۇيىمدار بار.

ءىس-شارا اياسىندا ەلىمىزدىڭ بەلگىلى ونەرپازدارىنىڭ قاتىسۋىمەن كونسەرت ءوتتى.