21 قاراشادا ۇكىمەتتىك ەمەس ۇيىمدارعا ارنالعان سىيلىقاقىلاردى تابىستاۋدىڭ سالتاناتتى ءراسىمى ءوتتى دەپ حابارلايدى Qamshy.kz اقپارات اگەنتتىگى. سىيلىقاقىلار 59 ۇەۇ-عا الەۋمەتتىك مىندەتتەردى شەشۋگە قوسقان ۇلەستەرى ءۇشىن بەرىلدى. ءىس-شارانىڭ ۇيىمداستىرۋشىسى ءدىن ىستەرى جانە ازاماتتىق قوعام مينيسترلىگى بولىپ تابىلادى.

ۇەۇ-عا سىيلىقاقى تاعايىنداۋ ءۇشىن وتىنىمدەر اعىمداعى جىلدىڭ 1 شىلدەسىنەن 31 تامىزىنا دەيىن قابىلداندى.

ساراپشىلار توبىنىڭ قۇرامىنا مەملەكەتتىك ورگاندىڭ، حالىقارالىق ۇيىمداردىڭ، ساراپشىلار قاۋىمداستىعىنىڭ وكىلدەرى، اتاقتى قوعام بەلسەندىلەرى مەن جۋرناليستەر كىردى. ولاردىڭ قاتارىندا پروفەسسور، ق ر ۇعا اكادەميگى عاريفوللا ەسىم، «ايماق» قق پرەزيدەنتى ايگۇل سولوۆيەۆا، قوعام بەلسەندىسى دجوحار وتەبەكوۆ، قازاقستاندىق قۇقىق قورعاۋشى ەۆگەنيي جوۆتيس، اتاقتى بلوگەر عالىم بايتۇق، بارلىعى 66 ساراپشى بار.

ساراپشىلار قاۋىمداستىعىمەن 216 ءوتىنىم قاراستىرىپ، الەۋەتتى ۇمىتكەرلەردى تاڭداپ الدى. وتىنىمدەر قازاقستاننىڭ ءتۇرلى ايماعىنان كەلىپ ءتۇستى. ەڭ كوپ ۇمىتكەرلەر استانا ق. – 49، الماتى ق. – 33 جانە الماتى وبلىسىنان – 29 ءوتىنىم بولدى. ءدىاقم جانىنداعى ۇەۇ ءوزارا ءىس-قيمىل جونىندەگى ۇيلەستىرۋ كەڭەسىنىڭ وتىرىسىندا 59 ۇيىمعا سىيلىقاقى تاعايىنداۋ ۇسىنىلدى.

سىيلىقاقىلار «قر-داعى مەملەكەتتىك الەۋمەتتىك تاپسىرىس، ۇەۇ-عا ارنالعان گرانتتار جانە سىيلىقاقىلار تۋرالى» ق ر زاڭىنا سايكەس 15 نوميناسيا بويىنشا بەرىلدى. ءاربىر سىىيلىقاقىناڭ مولشەرى 4،5 ملن. تەڭگەنى قۇرايدى.