سوڭعى 2-3 جىل كولەمىندە قازاقتىڭ ءتول ونەرى ايتىستىڭ باسىنان سور ارىلمادى. ءبىر كەزدە بيلىك ايتىستى كوگىلدىر ەكراننان الىپ تاستاعان ەدى، ەندى ايتىستىڭ جاڭا “جاناشىرلارى” پايدا بولىپ، ايتىسى ءدىن مەن ساياساتتىڭ قۇرالى ەتىپ، ءتىل كەسپەككە دەيىن بارۋدا...
«قۋىرداقتىڭ كوكەسىن تۇيە سويعاندا كورەسىڭ» دەمەكشى، «جاناشىرلىقتىڭ» كوكەسىن، لاقپا ايتىستان كوردىك. ەلوردا دا «جۇلدىزدار ايتىسادى» اتتى ايتىسسىماق شوۋ وتكىزىپ، ايتىسكەرلەر مەن انشى-ارتىستەردى ايتىستىرىپ قويىپ ءماز بولىپ وتىرعانداردى كوردىك. مىنە، قازاقتا بۇدان وتكەن ماسقارا بولماس. ۇلىقپان شىقتى گيتاراسىمەن، قانات ءالجاپپاروۆ اۋىزىن بىرەسە دومبارا قىلىپ، بىرەسە اڭگىمە ايتىپ، بىرەسە ولەڭ ايتىپ لاعىپ كەتتى، ال ايتىسكەرلەر بولسا كادىمگى ايتىستا وتىرعانداي ايتىسىپ وتىر. "جۇلدىزدار ايتىسى" تورەشىلەرىنىڭ ءبىرى بەكبولات تىلەۋحان بولسا، ابايدىڭ كەزىندە دە لاقپا ايتىس بولعانىن ايتتى.
مۇمكىن، بەكەڭ ايتقانداي ول كەزدەدە لاقپا ايتىس بولعان شىعار. دەگەنمەن ءدال قازىرگىدەي ەلدى اۋىزىنا قاراتقان ايتىسكەر اقىندار مەن تاعى ءبىر ونەردىڭ يەسى ايتىسىپ، ەكەۋى ەكى جاققا لاقپاعانى، بۇگىنگىدەي ولەڭ دەگەننىڭ نە ەكەنىن تۇسىنبەيتىن ادام اقىنمەن ايتىسىپ وتىرماعانى انىق. بولسا "ءبىرجان مەن سارانىڭ" ەمەس، الدەبىر توكپە اقىن مەن لاقپا اقىننىڭ ايتىسى بىزگە جەتكەن بولار ەدى. شوۋ جاسايمىز دەيدى، ءبىز ايتىسسىز-اق شوۋعا جارىماي ءجۇرمىز بە؟! ءانشى، ءارتىسسىز دە ايتىستىڭ ءوز كورەرمەنى وزىنە جەتەدى، ايتىستىڭ دەڭگەيىنە سىن ايتقىزباس اقىندارىمىز دا جەتەدى، ايتىسكەرلەرسىز دە كۇندەلىكتى شوۋىمىز بولىپ جاتىر. ەندى كەلىپ ايتىسقا ويىنا كەلگەندەرىن تىقپالاپ، كىم كورىنگەندى اكەلىپ سارىتىپ كەتەتىن لاس ورتاعا اينالدىرىپ نە كەرەك؟ ايتىسقا، ولەڭگە ءبىر تابان جاقىندىعى جوق، ولەڭنىڭ ءيسى مۇرىنىنا بارمايتىن ادامدى ايتىسكەرمەن ايتىستىرىپ قويۋ – ايتىسكەرلەردى قورلاۋ، ال ايتىسكەردى قورلاۋ، ول – ايتىستى قورلاۋ. وكىنشكە وراي، قازىرگى كۇندە كەي ايتىسكەرلەرىمىز ايتىستى دا، ءوزىن دە قورلاپ ءجۇر.
ايتىستى قايتا ءتىرىلتىپ، جانداندىرعىسى كەلگەندەر جانازاسىن شىعارىپ تىنباسا بولدى. ۇلت رۋحانياتىنا جاسالعان مۇنداي قياناتتىڭ دەر شاعىندا تىزگىندەلگەنى ءجون. شىن جاناشىر بولسا ەل ىشىندە تانىلماي جۇرگەن تالانتتار مەن جاس جەتكىنشىكتەردى حالىققا تانىتىپ، قازاقتىڭ قاسيەتتى ايتىسىن «نۇروتانعا» ەمەس ۇلتقا قىزمەت قىلعىزسىن!
ايتىستى مازاققا اينالدىرۋ - قازاقتى تابانعا تاپتاۋ، ۇلتتىڭ ۇلى قۇندىلىعىن ويىنشىق قىلۋ. وعان استە جول بەرۋگە بولمايدى.
تۇردىبەك قۇرمەتحان
