ودەسسا وبلىسىنىڭ بۇرىنعى گۋبەرناتورى ميحايل سااكاشۆيلي ءوزىن ۋكرايندىق وليگارحتاردىڭ تۇتقىنىمىن دەپ اتادى. بۇل تۋرالى ول كييەۆتە وتكەن پەچەرسك ايماقتىق سوتىنىڭ زالىندا 11 جەلتوقساندا مالىمدەدى، دەپ Qamshy.kz اقپارات اگەنتتىگى ينتەرفاكسقا سۇيەنىپ جازادى.

«بىزگە ەشقانداي كونفرونتاسيانىڭ كەرەگى جوق، مەن ەشقانداي دا جەدەل ءىس-قيمىل جاساۋعا شاقىرىپ تۇرعام جوق»، دەگەن سااكاشۆيلي ءوز جاقتاستارىمەن بىرگە ۋكراينانىڭ ءانۇرانىن ايتتى.

پەچەر سوتى سااكاشۆيليگە قاتىستى سوت ءىسىن دۇيسەنبىدە تۇستەن كەيىن باستاعان. وعان تاعىلعان ايىپ: «ۇيىمداسقان توپپەن بىرگە قىلمىس جاساۋ». باس پروكۋراتۋرانىڭ حابارلاۋىنشا، ول «رۋحتىڭ جاڭا كۇشتەرى» ساياسي قوزعالىسىنىڭ كوشباسشىسى جانە بۇرىنعى پرەزيدەنت ۆيكتور يانۋكوۆيچتىڭ قاراماعىنداعى ادامداردىڭ قارجىلاندىرۋىمەن بىرنەشە رەت ميتينگى ۇيىمداستىرعان.

سوت باستالىسىمەن سۋديا زالداعى جۋرناليستەردى شىعارىپ جىبەردى، سەبەبى ولار داۋىستارىن كوتەرىپ، سۇراقتار جاۋدىرا باستاعان. سىرتتا دا پوليسيا مەن سااكاشۆيلي ادامدارىنىڭ اراسىندا قاقتىعىس بولىپ، ولاردىڭ ءبىرى پوليسياعا ءتۇتىن شىعاراتىن زات لاقتىرعان.

سااكاشۆيليدى قاماۋعا 5 جەلتوقساندا الماق بولعان، الايدا بۇرىنعى ودەسسا وبلىسىنىڭ گۋبەرناتورىنىڭ ادامدارى ونى قورشاپ، ميكتواۆتوبۋسپەن قۇتقارىپ الىپ كەتكەن. ەكىنشى رەت 8 جەلتوقساندا ۇستاعان.