ساۋد ارابياسىنىڭ بيلىگى كينوتەاترلاردىڭ جۇمىسىنا سالىنعان تىيىمنىڭ الىنىپ تاستالعانىن ءمالىم ەتتى. اتالمىش ەلدە كينوتەاترلار 1983 جىلى جابىلعان بولاتىن، دەپ حابارلايدى قازاقپارات «بي-بي-سي»-عا سىلتەمە جاساپ. كوممەرسيالىق كينوتەاترلاردىڭ جۇمىسىنا 2018 جىلدىڭ قاڭتارىنان قايتا رۇقسات ەتىلەتىنى تۋرالى ساۋد ارابياسىنىڭ مادەنيەت جانە اقپارات مينيسترلىگىنىڭ مالىمەتىندە ايتىلعان. «بۇل مادەنيەت سالاسىنىڭ ەكونوميكاسىن دامىتۋدا وزگەرىستى كەزەڭ. كينوتەاترلاردىڭ اشىلۋى ەكونوميكا ءوسىمىن ىلگەرىلەتە ءتۇسىپ، ونى ءارتاراپتاندىرۋعا جول اشادى»، - دەدى مينيستر اللادا اللاۆاد.

سونداي-اق مينيستر تىيىمنىڭ الىنىپ تاستالۋى حانزادا مۇحاممەد يبن سالماننىڭ ىسكە اسىرىپ وتىرعان الەۋمەتتىك جانە ەكونوميكالىق رەفورمالارىنىڭ ءبىر بولىگى بولىپ تابىلاتىنىن اتاپ ءوتتى. كورولدىك ۇكىمەتىنىڭ جوسپارىنشا، 2030 جىلعا قاراي ەلدە 300 كينوتەاتر اشىلاتىن بولادى. بۇل 30 مىڭ جاڭا جۇمىس ورنىن اشىپ، جالپى ىشكى ونىمگە 24 ملرد دوللار كولەمىندە ۇلەس قوسپاق.

ايتا كەتەيىك، ەلدە وتكىزىلگەن الەۋمەتتىك رەفورمالاردىڭ تاعى ءبىرى - كەلەسى جىلدان باستاپ ايەلدەردىڭ كولىك جۇرگىزۋىنە تىيىمنىڭ الىنىپ تاستالۋى. بۇدان بولەك، 2018 جىلى اراب ايەلدەرىنە العاش رەت سپورتتىق ستاديوندارعا بارۋعا رۇقسات ەتىلەدى. ساۋد ارابياسىنىڭ سالت-داستۇرلەرىنە سايكەس، ايەل ادامنىڭ ءبىلىم الۋىنا، ساياحاتتاۋىنا جانە وزگە دە ءىس-شارالارعا قاتىسۋىنا تەك ەر ادام عانا رۇقسات ەتە الادى.