قازاقستاندىق اۋىر اتلەت يليا يلين دوپينگپەن ۇستالعان سپورتشىلاردى الاياق دەپ ساناۋعا قاتىستى پىكىرىن ءبىلدىردى، دەپ حابارلايدى Sputnik قازاقستان.
"مەن ءبىزدى الاياق دەپ سانامايمىن. ويتكەنى ءبىز ونداي ەمەسپىز، جەتىستىكتەرگە جەتۋ ءۇشىن كۇن-تۇن دەمەي، قارا تەرگە ءتۇسىپ ەڭبەكتەنەمىز. مەنىڭشە، الاياقتار باسقا "فورماتتاعى" ادامدار. وليمپيادا "التىنىن" جەڭىپ العاندا، ميلليونداعان ادام سەنىڭ قۋانىشىڭا ورتاقتاسىپ، قۋانىشتان كوزدەرىنە جاس الادى، ال الاياقتارعا ونداي قۇرمەت كورسەتىلمەيدى. ءبىز وليمپيادادا جەڭىسكە جەتۋ ءۇشىن 9-10 جىل ءوزىمىزدى كوپ نارسەدەن شەكتەيمىز، ءبىراز دۇنيەدەن باس تارتامىز"، — دەدى اتلەت بۇگىن ورتالىق كوممۋنيكاسيالار قىزمەتىندە وتكەن بريفينگتە.
يلين اقشا ۇلكەن ستيمۋل بولعانىمەن، سپورتشىلار ءۇشىن اقشادان بيىك ماقساتتار بار ەكەنىن ايتتى.
"ارينە اقشا سپورتشىنى ىنتالاندىرادى، ءبىراق ءبىزدىڭ ماقساتىمىز ودان دا جوعارى. ءبىز اقشا ءۇشىن جۇمىس ىستەمەيمىز. مەن كەيدە ادامدار وسىنداي سۇراق قويعاندا تاڭعالامىن. ءبىر كۇن نەمەسە ءبىر اپتا ءبىزدىڭ زالعا كەلىپ، ونداعى اتموسفەراعا كۋا بولساڭىزدار، ءبىزدى تۇسىنەسىزدەر. وندا قۋانىش تا، كوز جاسى دا، مۇڭايۋ دا، جابىعۋ دا – ءبارى بار. ءبىز قانشاما پسيحولوگيالىق كۇيزەلىستى باستان كەشىرەمىز. ءيا، ءبىز قيىن جاعدايعا تاپ بولدىق. ءبىراق بۇل تەك مەنىڭ نەمەسە ءبىزدىڭ قىزداردىڭ عانا ەمەس، سپورت سالاسىنداعى پروبلەما. سوندىقتان مەنىڭشە، ءبىزدى الاياقتار قاتارىنا جاتقىزۋ دۇرىس ەمەس. ءبىز ەل يگىلىگى ءۇشىن جۇمىس ىستەپ ءجۇرمىز"، — دەدى يلين.
سپورتشى ەگەر مەملەكەت پاتەر مەن كولىكتى كەرى سۇراسا قايتارۋعا دايىن ەكەنىن ايتتى.
ەستەرىڭىزگە سالىپ وتسەك، يليا يلين دوپينگ سىناماسىندا تىيىم سالىنعان زاتتار تابىلعاننان كەيىن، 2008 جىلعى جانە 2012 جىلعى وليمپيادالاردا جەڭىپ العان التىن مەدالىنەن ايىرىلعان بولاتىن. IWF تارتىپتىك كوميسسياسىنىڭ شەشىمىمەن، اۋىر اتلەت ەكى جىلعا سپورتتان شەتتەتىلدى. ق ر اۋىر اتلەتيكا فەدەراسياسىنىڭ كومەگىمەن سپورتشى وليمپيادادان باسقا دودالاردا العان ماراپاتتارى مەن تيتۋلدارىن ساقتاپ قالدى.
ديسكۆاليفيكاسيا زاڭبۇزۋشىلىق انىقتالعان ساتتەن باستاپ، ياعني 2016 جىلدىڭ 10 ماۋسىمىندا كۇشىنە ەندى.
وسىلايشا، ءيليننىڭ سپورتتان شەتتەتىلۋ مەرزىمى 2018 جىلدىڭ ماۋسىمىندا اياقتالادى، سودان كەيىن سپورتشى توكيودا وتەتىن وليمپياداعا قاتىسا الادى.
ايتا كەتسەك، يليا يلين – ءۇش ءتۇرلى سالماق دارەجەسىندە ءتورت دۇركىن الەم چەمپيونى، 94 كەلى سالماققا دەيىنگى ازيا ويىندارىنىڭ ەكى دۇركىن چەمپيونى.
