مينيستر اتاپ وتكەندەي، نەگىزگى كاپيتالعا سالىنعان ينۆەستيسيالاردىڭ ءوسۋ قارقىنى 2016 جىلمەن سالىستىرعاندا 2،8 ەسەگە ءوسىپ، 5،7% قۇرادى. جىل باسىنان بەرى جىلدىق ينفلياسيا دەڭگەيى بەلگىلەنگەن دالىزدە بولدى (6-8%) جانە قاراشانىڭ قورىتىندىسى بويىنشا 7،3% قۇرادى.

ەكونوميكانى ءارتاراپتاندىرۋ، اگروونەركاسىپتىك كەشەندى، كاسىپكەرلىكتى جانە ينفراقۇرىلىمدى دامىتۋ، سونداي-اق جۇمىسپەن قامتۋ باعدارلامالارىن ىسكە اسىرۋ ناتيجەسىندە ەكونوميكانىڭ بارلىق سالالارىندا وڭ سەرپىن بايقالادى.

التى نەگىزگى سالانىڭ ناقتى سەكتورىندا ونەركاسىپ، كولىك جانە بايلانىس سالاسىندا ەڭ كوپ ءوسۋ بايقالادى. تاۋ-كەن وندىرىسىندە مۇناي مەن تابيعي گاز ءوندىرۋدىڭ ەكى ەسەلەنگەن وسۋىنە بايلانىستى 9،6% ءوسىم بەلگىلەنگەن.

«وڭدەۋ ونەركاسىبى ءوسىمىنىڭ درايۆەرلەرى فارماسيەۆتيكا ونىمدەرى، جيھاز شىعارۋ، جەڭىل جانە مەتاللۋرگيا ونەركاسىبى، مۇناي وڭدەۋ ونىمدەرى، ازىق-تۇلىك جانە سۋسىندار، سونداي-اق ماشينا جاساۋ سالاسى بولدى. اۋىل شارۋاشىلىعىندا ءوسىم وسى جىلدىڭ قاڭتار-قىركۇيەك ايلارىنداعى 1،9%-دان، 11 ايدىڭ قورىتىندىسى بويىنشا 2،3%-عا دەيىن ءوستى»، — دەدى مينيستر.

بۇدان وزگە، تيمۋر سۇلەيمەنوۆتىڭ ايتۋىنشا، ەكونوميكانىڭ ناقتى سەكتورىنداعى ىسكەرلىك بەلسەندىلىك، ساباقتاس سالالارعا سۇرانىس تۋدىرا وتىرىپ، قىزمەت كورسەتۋ سەكتورىنىڭ ءوسۋىن ىنتالاندىردى. ماسەلەن، وسى جىلدىڭ 11 ايىندا كولىك قىزمەتتەرى 4،8%-عا، بايلانىس — 3،2%-عا، ساۋدا — 2،8%-عا، سونىمەن قاتار جىلجىمايتىن مۇلىك وپەراسيالارى — 2،5%-عا ءوستى.

«بيىل قاڭتار-قاراشا ايلارىندا نەگىزگى كاپيتالعا سالىنعان ينۆەستيسيالار كولەمى 5،7%-عا ارتىپ، 7،5 ترلن تەڭگەگە جەتتى. ينۆەستيسيالاردىڭ نەگىزگى ءوسىمى اۋىل شارۋاشىلىعىنا، ساۋداعا، قۇرىلىس پەن ونەركاسىپكە باعىتتالدى»، — دەپ مالىمدەدى مينيستر.

بايانداماشى 10 ايدا يمپورتتىڭ وسۋىنەن ەكسپورتتىڭ ءوسۋىنىڭ ەكى ەسە كوپ تارالۋى ناتيجەسىندە ساۋدا تەڭگەرىمىنىڭ سالدوسى 71،7%-عا وسكەنىن اتاپ ءوتتى. سونداي-اق، ساۋدا تەڭگەرىمى وڭدەلگەن ونىمدەردى ەكسپورتتاۋدىڭ ارتىرۋ ەسەبىنەن دا جاقساردى.

تۇتاستاي العاندا، ەلدىڭ سىرتقى ساۋدا اينالىمى 25،6%-عا ارتىپ، $62،1 ملرد قۇرادى.

«ەكونوميكانىڭ تۇراقتى ءوسىمى الەۋمەتتىك كورسەتكىشتەردىڭ جاقسارۋىمەن قاتار ءجۇردى. نەگىزگى باسىمدىقتاردىڭ ءبىرى جاڭا جۇمىس ورىندارىن اشۋ بولدى. ماسەلەن، وسى جىلدىڭ 9 ايىندا جالدامالى قىزمەتكەرلەر سانى 53،1 مىڭ ادامعا ارتىپ، 6،4 ملن ادامدى قۇرادى»، — دەدى مينيستر.

2017 جىلعى قاڭتار-قازان ايلارىندا ورتاشا ايلىق اتاۋلى جالاقى 4،6%-عا ارتىپ، 146،5 مىڭ تەڭگەگە دەيىن جەتتى.

«جالپى العاندا 11 ايدىڭ قورىتىندىسى بويىنشا قازاقستان ەكونوميكاسى تۇراقتى ءوسۋ قارقىنىن كورسەتىپ وتىر، بۇل جىل قورىتىندىسى بويىنشا ءجىو-نىڭ 4% دەڭگەيىندە ءوسۋىن شامالاۋعا مۇمكىندىك بەرەدى»، — دەدى ت. سۇلەيمەنوۆ.

سونىمەن قاتار وتىرىس بارىسىندا وسى ماسەلە بويىنشا ۇلتتىق بانك ءتوراعاسى دانيار اقىشيەۆ ءسوز سويلەدى.