ورتالىق كوممۋنيكاسيالار قىزمەتىندە «اقپارات تاراتۋدا ادەتتەن تىس امالدار مەن ءتۇرلى الاڭداردى قولدانۋ» اتتى دوڭگەلەك ۇستەل ءوتتى. اتالعان شارا ق ر اقپارات جانە كوممۋنيكاسيالار مينيسترلىگىنىڭ تاپسىرىسى بويىنشا باس رەداكتورلار كلۋبىنىڭ ۇيىمداستىرۋىمەن ءوتتى، دەپ Qamshy.kz اقپارات اگەنتتىگى جازادى. 

شاراعا ەلگە بەلگىلى ب ا ق پەن مەملەكەتتىك ورگاندار وكىلدەرى قاتىستى. دوڭگەلەك ۇستەل بارىسىندا سىبايلاس جەمقورلىققا جانە ءدىني ەكسترەميزمگە قارسى ارەكەت ەتۋ بارىسىنداعى اقپارات تاراتۋ جۇمىستارى، ب ا ق پەن مەملەكەتتىك ورگانداردىڭ باسپا ءسوز قىزمەتىنىڭ ءرولى، حالىققا اقپارات تاراتۋدىڭ ءتيىمدى جولدارى، ب ا ق پەن بيلىك وكىلدەرىنىڭ اراسىنداعى ىسكەرلىك قارىم-قاتىناسىن نىعايتۋ سەكىلدى تاقىرىپتار تالقىلاندى.

جيىندا باس رەداكتورلار كلۋبىنىڭ پرەزيدەنتى ەرلان بەكحوجين جەمقورلىقپەن كۇرەسۋ جولدارىنداعى بۇقارالىق اقپارات قۇرالدارىنىڭ رولىنە توقتالىپ، جۋرناليستىك زەرتتەۋلەر جۇرگىزۋ ارقىلى بۇل ماسەلەلەردى بارىنشا جان-جاقتىلى حابارلاپ وتىرۋدى ورتاعا قويدى. قازاقستان رەسپۋبليكاسى اقپارات جانە كوممۋنيكاسيالار مينيسترلىگى اقپارات كوميتەتى ءتوراعاسىنىڭ ورىنباسارى رۋسلان الىشيەۆ مينيسترلىك پەن كوميتەت تاراپىنان ىستەلىپ جاتقان جۇمىستار توڭىرەگىندە توقتالدى.

باس رەداكتورلار كلۋبىنىڭ قۇرمەتتى مۇشەسى كەنجەبولات جولدىباي «جەمقورلىق ماسەلەسى مۇنداي دوڭگەلەك ۇستەلدە عانا ايتىلىپ، حالىققا جەتپەي جاتىر. بىزدە اشىقتىق بولۋى كەرەك. قانشا مينيستر سوتتالعانىمەن ونىمەن ماسەلە شەشىلمەيدى. ماسەلە ءمينيستردى سوتتاۋعا دەيىن جەتكىزبەۋ ارقىلى شەشىلەدى. ونىڭ بارلىق ءىس-قيمىلدارى، جۇمىس باعىتتارى حالىق الدىندا اشىق بولۋعا ءتيىستى. حالىق قاداعالاپ وتىرا الاتىن بولۋى كەرەك. سوندا عانا شەنەۋنىكتى سوتتالاتىن دارەجەگە دەيىن جىبەرمەيدى. ءبىزدىڭ وسىندا ايتىلىپ جاتقان سوزدەرىمىز دە، بيلىكتىڭ سوزدەرى دە قاراپايىم حالىققا تۇسىنىكتى تۇردە اشىق جەتكىزىلىپ وتىرۋى كەرەك» ،-دەدى.

سونمەن قاتار «Qamshy.kz» اقپاراتتىق اگەنتتىگىنىڭ باس رەداكتورى قۋانىش ءبىلال ءسوز الىپ، سوڭعى كەزدەگى مينيسترلىك تاراپىنان بولىپ جاتقان كوڭىل بولۋلەر مەن اشىقتىقتى جوعارى باعالادى. جۋرناليتس، ل.گۋميليەۆ اتىنداعى ەۋرازيا ۇلتتىق ۋنيۆەرسيتەتىنىڭ دوسەنتى قانات اۋەسباي حالىققا تولىقتاي اقپارات جەتپەي جاتۋىنىڭ سەبەبىن رەسمي اقپاراتتاردىڭ باسىم باعىتى ورىس تىلىندە ەكەنىنە اۋداردى. «ءقازىر ەلىمىزدە قازاق ءتىلدى جاستار وتە كوپ، مەملەكەتتىك ءتىلدىڭ قولدانىسى ارتقان. سوندىقتان دا ولار وسى ماسەلەنى تالاپ ەتەلدى. بۇعان دەيىن دە ايتىلعان، شەشىمىن تاپپاي كەلە جاتقان ماسەلەلەردىڭ ءبىرى وسى»،- دەيدى ول.

شاراعا باسقا دا ب ا ق جاۋاپتىلارى مەن تۇلعالار قاتىسىپ، تاقىرىپ بويىنشا ويلارىن ورتاعا سالدى.