ۇلتتىق قاۋىپسىزدىك كوميتەتى سيريا مەن يراكتاعى قارۋلى قاقتىعىس ايماعىندا قالعان قازاقستاندىق بالالار سانىن ايتتى دەپ حابارلايدى Qamshy.kz اقپارات اگەنتتىگى sputniknews.kz-كە سىلتەمە جاساي وتىرىپ.
ۇقك ءتوراعاسىنىڭ ورىنباسارى نۇرعالي بىلىسبەكوۆتىڭ مالىمەتىنشە، قازىرگى ۋاقىتتا سيريا-يراك اۋماعىندا 16 جاسقا دەيىنگى 390 بالا بار – 214 ۇل، 176 قىز. "بىردەن ايتىپ وتەيىن، وسى ساندى تىلگە تيەك ەتىپ وتىرساق تا، شىن مانىسىندە سونشا بالانىڭ ءتىرى جۇرگەنىنە كەپىلدىك بەرە المايمىز. البەتتە، ولار بەلسەندى اسكەري وپەراسيالار، سيريا اسكەرى مەن كواليسيالار ايماعىندا. اتالعان بالالاردىڭ ءبارى امان-ەسەن دەپ ناقتى ايتا المايمىز"، — دەدى بىلىسبەكوۆ "ەكسترەميزم مەن تەرروريزمگە قارسى ءىس-قيمىل ماسەلەلەرى بويىنشا قازاقستاننىڭ كەيبىر زاڭناما اكتىلەرىنە وزگەرتۋلەر مەن تولىقتىرۋلار ەنگىزۋ تۋرالى" زاڭدى جۇزەگە اسىرۋ جونىندەگى مۇددەلى مەملەكەتتىك ورگاندار كەزدەسۋى بارىسىندا.
ۇقك مالىمەتىنە سۇيەنسەك، بومبالاۋ ايماقتارىنا قازاقستاننىڭ ازاماتتارى دا تاپ بولىپ جاتادى.
"ءبىز قايتا تەكسەرۋگە تىرىسىپ جاتىرمىز، بۇل وتە قيىن جۇمىس – ول جەردە ەشقانداي كونسۋلدىق قىزمەت جوق، بيلىكتىڭ ءوزى قاقتىعىس ايماقتارىن باقىلاۋعا قاۋقارسىز، دەگەنمەن بۇل جۇمىستى اتقارۋعا بارىنشا كۇش سالىپ جاتىرمىز"، — دەپ سەندىردى ۇقك ءتوراعاسىنىڭ ورىنباسارى.
ءقازىر قازاقستانعا 63 بالا قايتارىلعان، تاعى 50 بالانى الىپ كەلۋ جوسپارلانىپ وتىر. "بۇل بالالاردى وڭالتۋ ءۇشىن قاۋىرت جۇمىس ىستەۋمىز كەرەك بولادى"، — دەپ اتاپ ءوتتى بىلىسبەكوۆ.
